ټاکل شوې د افغانستان د سولې په تړاو د اپرېل په ۲۴مه په استانبول کې غونډه وشي، خو په غونډه کې له ګډون څخه د طالبانو انکار د دې سبب شوی چې ښايي دا غونډه په ټاکل شوي وخت ونه شي. دا غونډه د مارچ په ۲۷مه پلان شوې وه، چې بیا د اپرېل ۱۶مې ته وغځېده، خو د اپرېل په ۱۶مه هم جوړه نه شوه او ترکي چارواکو وویل چې غونډه به د اپرېل په ۲۴مه کېږي. په دې منځ کې طالبانو اعلان وکړ چې د بهرنیو ځواکونو تر وتلو پورې به په هېڅ داسې غونډه کې برخه نه اخلي چې د افغانستان په تړاو پکې پرېکړه کېږي. له دې سره امریکا هم اعلان وکړ چې ځواکونه به یې تر مې نه، بلکې تر سپټمبر میاشتې پورې له افغانستان څخه وځي.
اوس پوښتنه دا ده چې د استانبول غونډه کېږي او که کېږي، همغسې به وي، لکه چې په اړه یې ویل کېدل او که نه بدلون به پکې راځي؟
د استانبول غونډه د طالبانو د دریځ له امله ځنډېدلې ده. طالبان ویلي وو چې امریکا ورسره هوکړه کړې ده او چې په هوکړه عمل ونه کړي، نو دوی په دې غونډه کې برخه نه اخلي. په هوکړه کې له طالبانو سره درې لویې ژمنې شوې وې چې له افغانستان څخه د بهرنیو ځواکونو وتل، له تور لېسته د طالب مشرانو ایستل او د بندیانو خلاصون پکې شامل دي. بهرني ځواکونه وځي، خو په ځنډ او طالبان ډېر ډاډمن نه دي چې دا کار به کېږي. له تور لېست څخه د طالب مشرانو د نومونو په ایستلو کې هېڅ کار نه دی شوی. پینځه زره طالب بندیان خوشې شوي، خو اته زره نور لا هم په زندانونو کې دي او په دې برخه کې هم کوم پرمختګ نه دی شوی. اوس طالبان فکر کوي چې که دا کار ونه شي او دوی د ترکیې په غونډه کې ګډون وکړي او یوې پایلې ته ورسېږي، نو ښايي چې دا ژمنې بیا وروسته هم پوره نه شي. له همدې امله په دې غونډه کې له ګډون څخه یې تر اوسه پورې انکار کړی دی.
پر طالبانو ډېر فشارونه دي چې د استانبول غونډې ته ورشي او ښکاري چې طالبان به تمایل هم وښيي. طالبانو اوس منلې چې له امریکا، ترکیې او قطر سره یې خبرې روانې دي چې په غونډه کې د ګډون لپاره یوې پایلې ته ورسېږي. که طالبانو ته یو څه ډاډ ورکړل شي او په ځینو برخو کې ورته امتیاز ورکړل شي، نو ښايي طالبان خپله پخوانۍ پرېکړه بېرته واخلي او د استانبول په غونډه کې ګډون وکړي. که د بندیانو د خوشې کولو او له تور لېسته څخه د طالب مشرانو د ایستلو په برخه کې یو څه پرمختګ وشي او طالبان د بهرنیو ځواکونو د وتلو په برخه کې ډاډ تر لاسه کړي، نو ښايي چې د استانبول په غونډه کې ګډون وکړي. خو دا هر څه وخت ته اړتیا لري.
نو پر دې اساس د استانبول غونډه کېدونکې ده، خو بیا به هم ځنډېږي او په ټاکل شوې نېټه یې کېدل ستونزمن ښکاري. له بله اړخه که دا غونډه کېږي هم، ښايي هغسې برخلیک تاکونکې نه وي، لکه له وړاندې یې چې تمه کېدله، ځکه چې طالبان بیا هم پرېکړې د بهرنیو ځواکونو تر وتلو پورې ځنډوي.