پخواني ولسمشر حامد کرزي په هېواد کې د روانې خونړۍ جګړې پړه یو ځل بیا پر پاکستان او امریکا اچولې ده. هغه له شپېګل ورځپاڼې سره په خپله مرکه کې ویلي چې امریکا په افغانستان کې په مستقیمه یا غیر مستقیمه توګه د جګړې له دواړو لورو ملاتړ کړی چې په پایله کې یې تر ټولو ډېره مرګ ژوبله ملکي افغانانو ته اوښتې ده. هغه ټینګار کړی چې د افغان جګړې د پای ته رسولو لپاره باید امریکا او پاکستان په ګډه له صداقت کار واخلي او تر څنګ یې دې طالبان د پردیو د ګټو لپاره روانه کړې جګړه پای ته ورسوي.
وروسته له هغې چې امریکایي ځواکونو تر جګړې مخکې له افغانستان د سرتېرو ایستل پیل کړل، په اړه یې ډول ډولې تبصرې خپرې شوې دي. پخواني ولسمشر حامد کرزي هم په همدې لړ کې له شپېګل ورځپاڼې سره په خپله تازه مرکه کې ویلي چې په اصل کې امریکا او پاکستان دواړه په افغانستان کې د روانې خونړۍ او نیابتي جګړې تر شا دي. د ده په خبره، امریکا پاکستان ته پیسې ورکولې، مرستې یې ورسره کولې، په داسې حال کې چې دغه هېواد په سیمه کې د ترهګرو ډلو او طالبانو ستر مالي او نظامي ملاتړی بلل کېږي. د ده په خبره، د امریکا مخکیني ولسمشر پخپله ویلي چې پاکستان ته یې میلیاردونه ډالر ورکړي او دا پیسې یې ټولې په تېرو ۱۹ کلونو کې دغه هېواد ته ورکړې دي.
پخواني ولسمشر حامد کرزي ویلي چې پاکستان په تېرو شاوخوا ۲۰ کلونو کې په افغانستان کې د جګړې تر شا دی او نن هم همدې چارې ته ادامه ورکوي، خو افغانان بیا هم له دوی د صداقت تمه لري. هغه په خپلو خبرو کې ویلي، د افغانستان جغرافیايي موقعیت ته په کتو د سیمې هېوادونه دلته خپلې موخې لري چې پاکستان هم دلته د خپلو ځینو ګټو خوندي کول غواړي. د ده په خبره، پاکستان غواړي د وسله والو ډلو د ملاتړ له لارې خپلو موخو ته ورسېږي، خو دا چاره یې ناکامه ده او افغانان یې پر وړاندې مقاومت ته ادامه ورکوي. د ده په خبره: «پاکستان هم خپلې ګټې لري. موږ ورسره د ښه ګاونډي په توګه پاتې کېدلی شو، خو دغه هېواد غواړي خپلې موخې د جګړو او بمونو د رالېږلو له لارې ترلاسه کړي، نړیوال باید دې مسئلې ته متوجه وي، خو افغانان به په دې توګه تسلیم نه شي».
پخواني ولسمشر حامد کرزي همدا راز ویلي چې د بهرنیو ځواکونو تر وتلو وروسته په افغانستان کې روانې جګړې ته د جهاد نوم او یا بل اسلامي رنګ ورکول په کار نه دي، ځکه دا د افغانانو پر وړاندې جګړه ده او ددې اړتیا ده چې د پردیو د ګټو لپاره روانه کړې جګړه ارو مرو پای ته ورسول شي. نوموړي پر طالبانو غږ وکړ، چې له افغان حکومت سره خبرو ته کېني او د پردیو د ګټو لپاره دې جګړه نه کوي، بلکې د خپل ولس د خوندیتوب لپاره دې د سولې لار خپله کړي. د ده په خبره: «د بهرنیو ځواکونو تر وتلو وروسته دلته جګړه جهاد نه دی، بل اسلامي رنګ دې نه ورکول کېږي. دا د پردیو د ګټو لپاره روانه شوې نیابتي جګړه ده. باید پای ته ورسول شي».
ښاغلي کرزي د یوې پوښتنې په ځواب کې دا هم ویلي چې دا د افغانانو جګړه نه ده، بلکې د افغانانو پر ضد روانه ده او د سیمې هېوادونه افغانان د یو بل پر ضد استعمالوي. د ده په خبره «دا زموږ جګړه نه ده. بلکې موږ د یو بل پر وړاندې کارول کېږو. دا د پردیو جګړه ده».
پخواني ولسمشر همدا راز په خپلو خبرو کې ویلي چې د سولې په برخه کې د سیمې د هېوادونو رښتینې همکاري اړینه ده. هغه په مسکو کې د ترویکا وروستۍ غونډې ته په اشارې ویلي چې د سیمې هېوادونه دې له افغانانو سره د روانې جګړې په پای ته رسولو کې رښتینې او هر اړخیزه همکاري وکړي، څو ټولې سیمې ته ثبات راشي او هېوادونه د یو بل پر وړاندې د دسیسو پر ځای سره همکار او ملګري پاتې شي.