په چين کې د کانکور ازموينه

په چين کې د جون په ۷مه نېټه د ۲۰۲۱م کال کانکور ازموينه پيل شوه، چې دوه ورځې به دوام ولري.

په چين کې سږ کال ۱۰.۷۸ ميليونه زده کوونکي د کانکور ازموينه ورکوي او د ټول هيواد په کابو ۷۲۰۰ ښوونځيو کې ۴۶۶۰۰۰ ټولګي د دغې ازموينې لپاره تيار شوي او د ۹۵۰ زرو څارونکو استادانو په شمول څه دپاسه ۱۴ لکه کارکوونکي د دې ازموينې لپاره په بېلا بېلو لنډمهاله دندو ګومارل شوي دي.

په چين کې د لېسو فارغينو څخه هر کال د جون له ۶مې تر ۸مې نېټې پورې پوهنتونونو کې د شاملېدو ملي ازموينه يا کانکور اخيستل کېږي.

په چين کې د کانکور ازموينه په دوو لويو برخو ويشل کیږي، یوه برخه يې ساینسي علوم دي او بله یې ټولنيز علوم دي. زده کوونکو چې په لېسه کې له يادو برخو کومه لوستلې وي، په همغې کې ازموينه ورکوي.

د چين بېلا بېل پوهنتونونه د دغې کلنۍ ازموينې نتيجې په نظر کې نيسي او د خپلو ځانګړو قواعدو له مخې زده کوونکي انتخابوي. د دغې ازموينې ټول سوالونه او پوښتنې د صلاحيت لرونکو ځانګړو ارګانونو، يا د ځينو ولايتونو د ازموينې ادارو لخوا ترتتیبيږي او وروسته بیا د چين د پوهنې وزارت لخوا په واحدو ترتيباتو ويشل کېږي.

د چين له پلازمېنې بېجينګ، شانګهای ښار، تيان جين ښار، جه جيانګ ولايت او جيانګ سو ولايت پرته د دغه هيواد په نورو ولایتونو او ښارونو کې د سږني کانکور سوالونه يو شان دي.

په چين کې د کانکور څو ډوله لايحې کارول کېږي.

لومړۍ لايحه: درې+اېکس (۳+X )  

د چين د کانکور درې+اېکس لايحه اوس د دغه هېواد په ډېری ولايتونو او ښارونو کې کارول کېږي. ”۳“ یعنې چيني ژبه، رياضي او بهرنۍ ژبه، د ” X“ مانا یې دا ده، چې زده کوونکي په ازموينې کې پخپله خوښه له ۳ ټولنيزو علومو (سياست، تاريخ او جغرافيا) يا ۳ سيانسي علومو (فزيک، کېميا او بيولوژي) څخه دوه انتخابولی شي.

دوهمه لايحه: درې + درې(۳+۳)

د چين د کانکور درې + درې لايحه د چين د شانګهای ښار، جه جيانګ ولايت، پلازمېنې بېجينګ، شان دونګ ولايت، تيان جين ښار او های نان ولايت کې کارول کېږي. د دغې لایحې لومړی ۳ د چيني ژبې، رياضۍ او بهرنۍ ژبې په مانا دي. دوهم ۳ یې بیا زده کوونکي په ازموينې کې له فزيک، تاريخ، سياست، جغرافيې، بيولوژۍ او کېميا څخه ۳ انتخابولی شي.

درېيمه لايحه: درې+یو+دوه(۳+۱+۲)

د چين کانکور درې+یو+دوه لايحه کې۳ د چيني ژبې، رياضۍ او بهرنۍ ژبې نښه ده، چې هر زده کوونکی بايد ورسره پوره بلدتيا ولري. د ۱ مانا دا ده، چې زده کوونکي د ازموينې لپاره له فزيک او تاريخ څخه يو انتخابولی شي. د ۲ مانا دا ده، چې زده کوونکي د ازموينو لپاره له سياست، جغرافيې، بيولوژۍ او کېميا څخه ۲ انتخابولی شي.

د چين د کانکور د ځوابونو ټولې پاڼې پر انټرنيټ پرتې وي او هر کس اجازه نه لري چې ويې ګوري. کله چې د کانکور ازموينه پای ته ورسېږي، کارکوونکي به د ځوابونو ټولې پاڼې راټولې کړي او پوليس يې د ساتلو دنده پر غاړه لري.

د کانکور د ځوابونو پاڼې په دوو برخو ويشل کېږي:

لومړۍ برخه يې د سوالونو څو ځوابه لرونکې پاڼې (objective questions)دي، چې پايله يې د کمپيوټر په ځانګړي سيستم مالوميږي او دوهمه برخه يې بیا د ذهني سوالونو د ځوابونو پاڼې (subjective questions)دي، هره پاڼه د دوو ښوونکو له لوري په ګډه کتل کيږي او نمرې ورکوي.

ټولې کتل شوې پاڼې د ۳ کلونو لپاره ساتل کيږي او هېڅوک يې د بيا چېکولو حق نه لري.

هر زده کوونکی د خوښې وړ پوهنتونونه انتخابوي او پر انترنيټ خپل غوښتنليکونه وړاندې کوي. د چين پوهنتونونه په دوو کچو ويشل شوي او زده کوونکي خپلې سویې ته په کتو پوهنتون انتخابوي.