د چين د کمونېست ګوند مرکزي کمېټې او دولتي شورا د جون په لسمه نېټه (( په جه جيانګ ولايت کې د لوړ کيفيت له پرمختګ او د ګډې شتمنۍ نمونوي سيمې له ابادۍ څخه ملاتړ )) مهم سند خپور کړ.
په دغه سند کې د جه جيانګ ولايت د نمونوي سيمې د ابادۍ په اړه څلور ستراتيژيکې موخې او د شپږو برخو مهم اقدامات ټاکل شوي او دا موخه پکې وړاندې شوې، چې جه جيانګ ولايت به تر ۲۰۲۵م کال پورې د دغې نمونوي سيمې د ابادۍ څرګندې لاسته راوړنې ولري او تر ۲۰۳۵م کال پورې به د لوړ کيفيت د پرمختګ لا ستر برياليتوبونه تر لاسه او ګډه شتمني به را منځته کړي.
د نوموړي سند د خپرېدو بنسټيزه زمېنه څه ده؟
ګډه شتمني د سوسياليزم اصلي غوښتنه او د خلکو هيله ده. په چين کې د اصلاحاتو او ورخلاصون له تطبيق وروسته په تيره بيا د چين کمونېست ګوند له اتلسم ملي کانګرس راهيسې د رئيس شي جين پينګ په مشرۍ د نوموړي ګوند د مرکزي کمېټې په مرکزيت د ګوند غړي او د هېواد د بېلا بېلو قومونو خلکو د ګډې شتمنۍ د رامنځته کولو پر لوري نه ستومانه کېدوونکي کوښښونه کړي او د هراړخيزې شتمنې ټولنې د ابادۍ په برخه کې يې ستر برياليتوبونه تر لاسه کړي دي، چې دغه کار د دغه هېواد د پرمختګ په نوې مرحلې کې د ګډې شتمنۍ د ابادۍ لپاره کلک بنسټ برابر کړی دی. چين د عصري سوسياليستيک هېواد د هراړخيزې ابادۍ پر لوري نوی سفر پيل کړی او د ټولو خلکو د ګډې شتمنۍ موخې ته يې لوړ ځای ورکړی او د دغې موخې د بشپړولو لپاره هلې ځلې کوي، څو خلک له ګډې شتمنۍ څخه رښتينې ګټې واخلي.
ولې جه جيانګ ولايت د ګډې شتمنۍ نمونوي سيمې په توګه ټاکل شوی؟
لومړی لامل يې دا دی، چې د جه جيانګ ولايت وضعيت نمونوي شکل لري. په دغه ولايت کې د خاورې مساحت او نفوس اندازې مناسبې دي، د غرونو، اوبو او کروندو په شمول ډېرې برابرې سرچينې لري، د ښارونو او علاقه داريو نفوس يې د کليوالو سيمو نفوس سره کابو برابر دی.
دوهم لامل يې دا دی، چې جه جيانګ ولايت د نمونوي سيمې د ابادۍ ښه بنسټ او غوره والی لري او د شتمنۍ کچه يې لوړه ده. په ۲۰۲۰ کال کې د دغه ولايت د توليداتو عمومي ارزښت ۶۴۶۰ ميليارډو يوانو ته رسيده او د هر تن منځنی ارزښت يې له ۱۰۰ زرو يوانو څخه زيات و. تېر کال د جه جيانګ ولايت د هر اوسېدونکي منځني عايدات د هېواد د منځني شمېر له ۱۶۳ فيصدو سره برابر وو. بل دا چې جه جيانګ ولايت برابر پرمختګ کوي. د بېلګې په توګه، په دغه ولايت کې د ښاري او کليوالو سيمو اوسېدونکو د عايداتو ترمنځ فاصله د هېواد د نورو سيمو په پرتله ډېره کمه ده.
درېيم لامل يې دا دی، چې جه جيانګ ولايت د اصلاحاتو او نوښت ټينګه اراده لري. دغه ولايت د اصلاحاتو په برخه کې ډېرې ګټورې تجربې لري او همدغه اراده او تجربې به يې د نمونوي سيمې په جوړونه کې اغېزمن رول ولوبوي.
جه جيانګ ولايت د ګډې شتمنۍ نمونوي سيمې د ابادۍ پر لاره ګامونه پورته کوي.
جه جيانګ ولايت د ياد سند له مخې د ګډې شتمنۍ د ابادۍ لپاره د ګټور ميکانيزم او تګلارو سيستم د جوړولو په هڅه کې دی. نوموړی ولايت د اقتصاد د باکيفيته پرمختګ، د عايداتو د وېش نظام د اصلاحاتو، له ښو عامو خدمتونو څخه د خلکو برخمنتيا، د ښارونو او کليو د برابر او همغږي پرمختګ، د سوسياليزم د پياوړي کلتور د پرمختګ، د ايکولوژيکي تمدن د ابادۍ او د ټولنې د ادارې په اوو برخو کې ۵۲ تدبيرونه طرحه کړي دي.
دغه ولايت به د اجنډا له مخې د لوړ کيفيت پرمختګ او د ګډې شتمنۍ نمونوي سيمې د ابادۍ موخې ته ورسيږي او هر کال به نوښتونه رامنځته کړي، په راتلونکو پنځو کلونو کې به ستر برياليتوبونه تر لاسه او پنځلس کاله وروسته به دغه نمونوي سيمه پوره جوړه شي.