په هېواد کې د جګړو او ناامنیو په دوام، طالبان ادعا کوي چې په تېرو دوو ورځو کې یې د نهو ولسوالیو مرکزونه نیولي دي. د بدخشان کوفاب، یاوان، ارګو، کوهستان، زېباک او بهارک؛ د کندهار پنجوايي؛ د پکتیکا زیروک او د تخار ورسج هغه ولسوالۍ دي چې طالبان یې په تېرو دوو ورځو کې د نیولو ادعا کوي.
خو افغان چارواکي بیا وايي چې امنیتي ځواکونو د یادو ولسوالیو له مرکزونو تکتیکي شاتګ کړی او ډېر ژر به له لاسه وتلې سیمې بېرته تر خپل کنټرول لاندې راولي. د ځانګړو ځواکونو د قول اردو قوماندان مشر هیبت الله علیزی وايي چې په تېرو ۲۴ ساعتونو کې یې د هېواد په ګوټ ګوټ کې د عملیاتو په ترڅ کې طالبانو ته درنه مرګ ژوبله اړولې ده.
بلخوا د بدخشان د ۱۷ ولسوالیو له سقوط سره جوخت، ځينو تاجکستاني رسنیو راپور ورکړی چې له یاد هېواد سره ګډې پولې ته له نږدې ولسوالیو تر دری سوو افغان ځواکونه د سختو جګړو او نښتو له کبله د تاجکستان خاورې ته اوښتي دي. له بدخشان سره په ګاونډ تخار ولایت کې هم جګړې او نښتې شدیدې شوي او د یاد ولایت له مرکز پرته ټولې ولسوالۍ د طالبانو لاس ته لوېدلي دي.
که څه هم له بګرام هوايي اډې څخه د ټولو امریکايي ځواکونو له وتلو یوه اونۍ نه کېږي، خو طالبانو وړمه شپه پر دې اډې پراخ بریدونه کړي دي. د پروان ولایت چارواکي بیا وايي چې د طالبانو دغه بریدونه یې پر شا تمبولي او دې ډلې ته یې ګڼه مرګ ژوبله اړولې ده.
بلخوا د ولسمشر غني لومړی مرستیال امرالله صالح وايي، طالبان هېڅکله افغانستان نه شي نیولی او دلته د حکومت کولو وړتیا هم نه لري. صالح په خپله ټویټرپانه کې لیکلي، دی اوسمهال د یووالي لپاره یو لوی فرصت ګوري، ځکه له هرې سیمې خلک خپلو ځایونو ته د افغان ځواکونو او کمانډویانو د ورتګ غوښتنه کوي.
صالح داسې مهال پر افغانستان د طالبانو واکمنېدل ناممکن بولي، چې په کابل کې د امریکا د سفارت شارژدافیر ویلي، په افغانستان کې د دوو لسیزو لاسته راوړنو د خوندیتوب او د سولې د ټینګښت لپاره باید تر وروستي بریده هڅې وشي. راس وېلسن دا خبره د امریکا د خپلواکۍ د ورځې په مناسبت په خپلو ټویټونو کې یاده کړې ده. وېلسن زیاته کړې، په افغانستان کې دوې لسیزې د ډیموکراسۍ، ازادۍ، پراختیا او روڼتیا په برخو کې خورا زیات پرمختګ وشو او اوس یې باید د خوندي کولو لپاره هر څه چې په وس پوره وي، وشي.
دا په داسې حال ده چې طالبان بیا وايي، د مې له لومړۍ نېټې راپه دېخوا یې د افغانستان په ۲۸ ولایتونو کې ۱۴۳ ولسوالۍ نیولې دي. د دې ډلې ویاند ذبیحالله مجاهد د ګڼو ولسوالیو یو نوملړ هم رسنیو ته استولی چې او ادعا کوي چې یادې ټولې ولسوالۍ د دوی په ولکه کې دي. د دغه نوملړ پر بنسټ تر ټولو ډېرې ولسوالۍ د افغانستان په شمالي ولایتونو کې سقوط شوې دي. په نوملړ کې تخار، بدخشان، فاریاب، جوزجان، بغلان، بلخ او پکتیا هغه ولایتونه دي چې طالبانو پکې د زیاتو ولسوالیو د نیولو ادعا کړې ده، خو د افغانستان د کورنیو چارو وزارت د طالبانو لهخوا په دې شمېر د ولسوالیو د نیولو ادعا ردوي.
د یاد وزارت ویاند طارق ارین وايي، د یو شمېر ولسوالیو له ځینو سیمو افغان ځواکونه بل ځای ته تللي، چې دا د سقوط په مانا نه ده.