چين په ۲۰۲۰ م کال کې نه يوازې په خپل هېواد کې د کرونا ويروس د خپرېدو مخه نيولې، بلکې د يو لړ اغېزمنو تدبيرونو په نيولو سره يې خپلو اقتصادي چارو ته هم پرمختګ ورکړی دی. چين د اقتصادي او ټولنيزو چارو د پرمختګ ۱۴م پنځه کلن پلان د ۲۰۲۱ کال په لومړۍ ربع کې خپور کړ او د راتلونکو ۵ کلونو لپاره يې خپله پرمختيايي نقشه جوړه کړې ده.
د روان کال په لومړيو ۶ مياشتو کې د چين اقتصادي پرمختګ سترې لاسته راوړنې درلودې او سويه يې د کرونا وبا له رامنځته کېدو مخکې وخت سره برابره ده، حتی ځينې شاخصونه یې د پخوا په پرتله نورهم ښه شوي دي. له دې څخه څرګندېږي، چې د چين حکومت د عمومي اقتصاد مناسبې تګلارې غوره کړي، د دغه هيواد اقتصادي چارې او د خلکو ژوند پر نوي لوري روان شوي او د کرونا وبا د خپرېدو له سترې ازموينې څخه تېر شوي دي.
د چين د احصائيې ملي ادارې يو لړ شمېرې ښيي، چې د ۲۰۲۱ کال په لومړۍ نيمايي کې د چين د کورني توليد عمومي ارزښت (GDP) د تېر کال د همدې مودې په پرتله ۱۲.۷٪ زيات شوی، په تېره بيا د روان کال په لومړۍ ربع کې د چين GDP د ۲۰۲۰ کال پرمختيايي تمايل ساتلی او د پانګونې او سوداګرۍ ښه چاپېريال يې بازار ته مثبت پيغامونه ورکړي دي.
د دې تر څنګ د چين ۱۴م پنځه کلن پلان به د دغه هيواد بازار لا خلاص کړي او د اقتصادي پرمختګ کيفيت ته به يې زياته پاملرنه وشي. د چين حکومت پلان لري، چې په روان کال کې يې GDP له ۶٪ نه پورته زياتوالی ومومي.
د نړيوال بانک د اټکل له مخې، په روان کال کې د چين د GDP زياتوالی ښايي ۸.۵٪ ته ورسېږي.
چين د روان کال په لومړۍ نيمايي کې د بهرنيو پانګو د راجلبولو په برخه کې هم برياليتوب ترلاسه کړی. د چين د سوداګرۍ وزارت د اړوندو شمېرو له مخې، په په دغه هيواد کې د روان کال په لومړيو ۶ مياشتو کې ۶۰۷ ميليارډه او ۸۴۰ ميليونه يوانه بهرنۍ پانګې کارول شوي، چې دغه اندازه د تېر کال د همدې مودې په پرتله ۲۸.۷٪ زياتوالی ښيي. په داسې حال کې چې نور هېوادونه لا هم د کرونا وبا ضد په سختې مبارزې بوخت دي، چين پر ځان د بهرنيو پانګوالو باور ساتلی دی. چيني حکومت د خپل اقتصادي پرمختګ د ساتلو په پار يو لړ تګلارې پلې کړي او پانګوالو ته يې دا پيغام ورکړی، چې دغه هيواد د دوی لپاره تر ټولو مناسب او ښه ځای دی.
د چين نړيوالې سوداګرۍ هم د تېر کال د چټک پرمختګ حالت ساتلی دی. په نړيوال بازار کې د چيني توليداتو اړتياوې زياتې شوي او د چين صاداتي اندازه په پر له پسې توګه زياتېږي. د چين د ګمروکاتو عمومي ادارې د احصائيې له مخې، د ۲۰۲۱م کال په لومړۍ نيمايي کې د چين د مادي سوداګرۍ عمومي ارزښت ۱۸۰۷۰ ميليارډو يوانو ته رسېدلی، چې د تېر کال د همدې مودې په پرتله ۲۷.۱٪ زياتوالی ښيي. د جنوب ختيځې اسيا هېوادونو ټولنه ((اسيان)) د چين لومړی لوی سوداګريز همکار دی او د دواړو خواوو ترمنځ سوداګريز حجم له۱۹۱ ميليارډو يوانو څخه اوښتی دی. دغه شمېر د چين د سوداګرۍ عمومي اندازې په سلو کې ۱۴.۷ نیولی دی.
برسېره پر دې، د چين تصديو هم د خوښې وړ پرمختګ کړی دی. د چين د دولتي شورا د دولتي سرمايو اداري کمېټې اړوندې شمېرې ښيي، چې د روان کال په لومړۍ نيمايي کې د چين مرکزي تصديو ۱۰۲۳.۲۱ ميليارډه يوانه ګټې ترلاسه کړي، چې دا د تېر کال د همدې مودې په پرتله ۱۳۳.۳ ٪ زياتوالی ښيي.
دغه راز د چين په ښارونو او ښارګوټو کې د بې روزګارۍ انډول هم ټيټ شوی دی. د مثال په توګه د روان کال په مارچ کې د چين په ښارونو او ښارګوټو کې د بې روزګارۍ انډول ۵.۳٪ ښودل شوی، چې د تېرې فبرورۍ په پرتله کابو ۰.۲٪ ټيټوالی ښيي.
په ټوله کې ویلی شو، چې د چين اقتصاد اوس اعاده شوی او ښه پرمختيايي تمايل يې ساتلی دی.