په افغانستان کې د امنیتي وضعیت له ترینګلتیا او پر لویو ښارونو د وسله والو طالبانو له پراخو بریدونو وروسته، ولسمشر غني نن د ملي شورا د دواړو جرګو فوق العاده غونډه رابللې وه. نوموړي په یاده غونډه کې وویل چې حکومت یې د سولې لپاره لویه قرباني ورکړې او په دې برخه کې یې هېڅ ډول هڅې نه دي سمپولي، خو په خبره یې طالبانو د دې هرڅه په بدل کې یوازې پر جګړې تمرکز کړی او د ټولو هوکړو خلاف یې افغان وژنې ته دوام ورکړی دی. هغه زیاته کړه: «پایدارې او عادلانه سولې ته رسېدو لپاره موږ لویه قرباني ورکړې او لویه بیه مو پرې کړې ده. موږ ډېره نرمي وښودله او داسې ګامونه مو واخیستل چې د نړۍ په هېڅ کونج کې یې حکومت د پورته کولو جرئت نه لري، خو زموږ دښمن نه یوازې د سولې خوا ته ګام وانخیست، بلکې زموږ اخلاص او صداقت یې زموږ کمزوري وګڼله او تاسې شاهد یئ چې جنګ یې پر موږ تحمیل کړ.»
نوموړي دغه راز ټينګار وکړ، چې لا هم سولې ته ژمن دی، خو په خبره یې طالبان هڅه کوي چې د زور له لارې واک ته ځان ورسوي. د ولسمشر په خبره، دغې ډلې د پخوا په پرتله منفي تغیر کړی او تر پخوا زیات د پردیو په اشارو د خپلو افغانانو پر وړاندې ظلم ته دوام ورکوي. هغه زیاتوي: «طالب د ۲۴ کلونو وړاندې طالب نه دی، تر پخوا متشدد شوی، له نړیوالو ترهګرو سره یې نه یوازې دا چې اړیکې ته دي پرې کړي، بلکې نورې یې هم ورسره پیاوړې کړي.»
ولسمشر دغه راز د اوسني وضعیت اصلي لامل په ناڅاپي توګه له افغانستانه د ټولو بهرنیو ځواکونو وتل بولي، خو په خبره یې، افغانان په خپل یووالي او واحد دریځ سره له روان پېچلي وضعیت څخه وتلی شي. هغه یو ځل بیا ټینګار وکړ چې نوي پلان له مخې به تر راتلونکو شپږو میاشتو په روان وضعیت کې د پام وړ بدلون راشي. نوموړي زیاته کړه: « زموږ امنیتي پلان واضېح دی، نه غواړم دلته پرې مفصل بحث وکړم. یوازې دومره وایم چې ټولې امادګۍ مو نیولې، ترڅو په راتلونکو شپږو میاشتو کې د فتنې دغه موج دفع کړو او د استقرار حالت ته ورسېږو. په دې کې هم شک نشته چې د دې پلان مهم عنصر، زموږ د امنیتي او دفاعي ځواکونو ترڅنګ د خلکو بسیج دی.»
بلخوا د ملي شورا دواړو جرګو هم په یوه ګډه اعلامیه کې د جمهوري نظام او د تېرو دوو لسیزو له لاسته راوړنو پر خپل ملاتړ ټینګار وکړ او له طالبانو یې وغوښتل چې د سولې لار خپله کړي او نور دې روانو ناخوالو، ورانیو او افغان وژنې ته د پای ټکی کېږدي.
ولسمشر دغه راز خبرداری ورکړ چې هېڅ ورانوونکې ډلې ته به تسلیم نه شي او په وینا يي، یا به د سولې له لارې یوې هوکړې ته رسېږي او یا به هم د جګړې په ډګر طالبانو ته ماتې ورکوي. بلخوا طالبانو هم د ولسمشر دغو څرګندونو ته غبرګون ښودلی دی. د دې ډلې ویاند ذبیح الله مجاهد ویلي چې ولسمشر غني په دې ډول خبرو غواړي چې روان وضعیت کابو کړي، خو په خبره یې، دغه ډول خبرې او تورونه به هېڅ ځای ونه نیسي.