د هېواد په بېلابېلو سیمو، په ځانګړي ډول په ښارونو کې جګړو خلک سخت خواشیني کړي دي. وروستي معلومات ښيي چې یوازې په لښګرګاه کې جګړو سلګونو کسانو ته مرګژوبله اړولې ده. پرون یوناما ویلي وو چې په تېرو ۲۴ ساعتونو کې ۴۰ ملکي وګړي وژل شوي او ۱۱۸ نور ټپیان دي. اټکل دی چې واقعي شمېرې به تر دې زیاتې وي. حکومتي اړخ طالبان ګرموي چې په ښارونو یې بریدونه پیل کړي او غواړي د زور له لارې واک ته ورسېږي. طالبان بیا حکومتي ځواکونه ګرموي چې هوايي بریدونه کوي او ملکي وګړو ته پکې مرګژوبله اړوي.
د جګړې د ښکېلو لورو ملامتیا پر خپل ځای او هېڅوک یې له ملامتیا څخه ژغورلی هم نه شي، خو روانه جګړه لا هم د امریکايي موخو لپاره ده چې پکې د افغانانو وینې تویېږي. امریکا نه غواړي چې په افغانستان کې جګړه ختمه شي، ځکه چې که د دوی له وتلو وروسته جګړه ختمه شي، نو نړۍ ته به د دې پیغام دا وي چې په افغانستان کې د جګړې لامل امریکا وه او د امریکايي ځواکونو له وتلو وروسته افغانانو جګړه پرېښوده او په خپلو منځونو کې یې سوله وکړه. د همدې پیغام د مخنیوي لپاره امریکا داسې لوبه مخته وړي چې جګړه دوام وکړي او نړۍ ته وښيي چې دوی په افغانستان کې د جګړې لامل نه وو، بلکې دا افغانان دي چې یو بل سره وژني او د دوی له وتلو وروسته هم جګړه روانه ده، لا زیاته شوې، خونړۍ شوې او ډېر افغانان پکې وژل کېږي.
د دې لپاره ډېر دلایل شته چې امریکا د اوسنۍ جګړې تر شا ده او له وړاندې یې داسې لارې چارې برابرې کړې دي، چې جګړه دوام وکړي. د امریکا او طالبانو تر منځ د سولې تړون او بیا په دې تړون کې د ځینو مسایلو راوړل د دې لپاره وو، چې جګړه دوام وکړي. له بله اړخه امریکا همدا اوس هم د جګړې دواړو لورو ته پټ او ښکاره داسې پیغامونه لېږدوي چې مخامخ د جګړې د زیاتوالي سبب کېږي. تر ګردو ښکاره یې په جګړه کې هوايي بریدونه دي. امریکا د هوايي بریدونو پر مټ له یوه اړخه د طالبانو جنګیالیو ته دا پیغام ورکوي، چې دوی په بین الافغاني جګړه کې نه دي ښکېل، بلکې له هغه لوري سره جګړه کوي چې امریکا یې مخامخ هوايي ملاتړ کوي. له بله اړخه د امریکا بریدونه داسې هم نه دي چې د طالبانو د پرمختګ مخه دې ونیسي. که امریکا رښتیا غوښتلی چې د طالبانو د پرمختګ مخه ونیسي، دا بریدونه به یې ښارونو ته د طالبانو له راتګ وړاندې کړي وو، خو چې کله هغوی ښارونو ته راغلل، نو بریدونه یې پرې پیل کړل.
د افغانستان روانه جګړه مخامخ د امریکايانو غوښتنه ده، که امریکا د سولې په نوم پروسه مخ ته وړله او که اوس هوايي بریدونه کوي او یا د افغان دولت د ملاتړ خبره کوي، په ټولو حالتونو کې یې موخه د واقعي سولې تخریب، د جګړې دوام او د افغانانو د تفاهم، پخلاینې او سولې مخنیوی دی. له همدې امله دواړو افغاني اړخونو ته پکار ده چې جګړه ودروي، سوله وکړي او د امریکا دا دسیسه شنډه کړي چې غواړي د خپلو موخو لپاره دلته لا زیاتې وینې تویې شي.