د جوبايډن په مشرۍ د امريکا حکومت له لوړې وروسته د ټرمپ د حکومت تګلاره غوره کړې او پر له پسې د بادارۍ او زورواکۍ کړنې ترسره کوي.
امريکا نه یوازې د هانکانګ مسئلې په پلمه د چين په کورنيو چارو کې سخته لاسوهنه کوي، بلکې پر چين بېلا بېل تورونه لګوي او د لويديځو رسنيو له لارې پروپاګنډ خپروي او د دې ترڅنګ يې پر چيني چارواکو تش په نوم بنديزونه هم لګولي دي.
سين هوا اژانس د اګست په ۴مه نېټه ((امريکايي سياستوال له چا سره درېږي؟)) يوه ليکنه خپره کړې ده.
دغه خبري اژانس په دغې ليکنې کې د چين په کورنيو چارو کې د امريکا له سختې لاسوهنې پرده پورته کړې او د دغه هېواد شوم نیت يې په ډاګه کړی دی.
په دغې ليکنې کې راغلي، چې د چين ملي ولسي کانګرس د مارچ په ۱۱مه نېټه د هانکانګ په ځانګړې اداري سيمې کې د انتخاباتو قانون د بشپړولو پرېکړه وکړه. د امريکا بهرنيو چارو وزارت همغه مهال پخپله او هم د ۷ هېوادونو ډلې له غړو سره د ګډې اعلاميې په خپرولو سره پر چين بې ځایه تورونه ولګول. د امريکا بهرنيو چارو وزارت د همدې مياشتې په ۱۷مه نېټه د چين د ملي ولسي کانګرس د دايمي کمېټې د مرستيال مشر په ګډون د دې هيواد پر ۲۴ چارواکو تش په نوم بنديزونه ولګول.
خو واقعیت دا دی، چې په هانکانګ کې د انتخاباتو قانون طرحې بشپړول د چين کورنۍ چارې دي او هېڅ بهرنی ځواک پکې د لاسوهنې حق نه لري. امريکا هم په خپلو انتخاباتو کې د بهرنيو ځواکونو د لاسوهنې د مخنيوي په هکله جدي قانوني مقررات لري، نو دغه هيواد ولې د چين په هانکانګ کې اړوندو مقرراتو ته دومره پاملرنه کوي؟
امريکا پر يادو چيني چارواکو د بنديز پلمه دا ده، چې چين د هانکانګ اداري چارې کمزورې کړې دي، خو په حقیقت کې د دوی دا تور له واقعيت سره هيڅ سمون نه لري. د هانکانګ د انتخاباتو قانون کې هغه اصل په نظر کې نيول شوی، چې هانکانګ بايد د هيوادپالو کسانو له لوري اداره شي او د هېواد او هانکانګ ضد ټول مخاليفين په ټاکنو کې ګډون نه شي کولی. په دغه قانون کې د هېواد او د هانکانګ ځانګړې اداري سيمې خونديتوب په ښه توګه تضمين شوی او د هانکانګ ديموکراتيک نظام په سالم توګه پرمختګ کوي.
د هانکانګ بېلا بېلو ټولنو او ډېرو سیاستوالو د تېر مارچ په ۱۱مه نېټه د انتخاباتو قانون د تفصيلاتو کارونه ترسره کړل او له دې قانون څخه د ملاتړ لپاره يې د څه باندې 2.38 ميليونو هانکانګيانو لاسليکونه راټول کړل.
د هانکانګ د ځه جين څېړنيزې ادارې د يوې سروې نتيجه ښيي، چې کابو ۷۰ سلنه هانکانګيان په دې اند دي، چې د انتخباتو قانون په بشپړېدو سره د هانکانګ د ښه راتلونکي په اړه د هانکانګيانو باور لا نور پياوړی شوی دی.
په دې ليکنه کې راغلي، چې د ۲۰۱۹م کال په جون مياشت کې په هانکانګ کې د رامنځته شوې نښتې له امله د دې سيمې اقتصاد په تېرو لسګونو کلونو کې په لومړي ځل منفي شوی و او ټولو خلکو ته ډېر زیانونه رسيدلي وو.
د ۲۰۲۰م کال په جون مياشت کې په هانکانګ کې د هېواد امنيت ساتونکی قانون تصویب شو او اوس په دې سيمه کې ټولنيز نظام او د خلکو ژوند عادي شوی دی.
د روان کال په لومړۍ ربعه کې په هانکانګ کې د جرمونو کچه د تېر کال د همدې مودې په نسبت 10 سلنه کمه شوې او د دې سيمې د توليداتو په ارزښت کې ۱۰ سلنه زياتوالی راغلی دی. په عين وخت کې د هانکانګ د دايمي خونديتوب د ساتلو په اړه د چين حکومت تدبيرونو هم د نړيوالې ټولنې پراخ ملاتړ تر لاسه کړی دی.
دا يو واقعیت دی چې امريکا د هانکانګ ديموکراسۍ ته هېڅ پاملرنه نه ده کړې، خو يوازې د هانکانګ مسئلې په پلمه د چين په کورنيو چارو کې لاسوهنه کوي او موخه يې دا ده، چې د چين د پرمختګ مخه ونيسي، خو امريکا به خپل دغه شوم نیت پوره نه کړي.