د وسله والو طالبانو له خوا د لسګونو ولسوالیو تر سقوط او پر لویو ښارونو تر ډله ییزې بریدونو وروسته، ولسمشر غني تېره اونۍ د ملي شورا ځانګړې ناسته راوبلله او په دغه ناسته کې یې وویل چې د نوي امنیتي پلان له مخې تر راتلونکو شپږ میاشتو پورې په هېواد کې د جګړۍ اوسنۍ بڼې ته بدلون ورکړي. نوموړي دغه راز زیاته کړه چې د تازه پلان پر اساس به د حکومت تر کنټرول لاندې اوسنې ټولې سیمې ساتل کېږي او په له لاسه وتلو سیمو کې به هم ډېر ژر پوځي عملیات پیل شي.
د افغان حکومت له دغه امنیتي پلان سره سره، وسله والو طالبانو لاهم خپلو جګړو ته شدت ورکړی او یادې ډلې په تېرو دوو ورځو کې د زرنج او شبرغان ښارونه هم تر خپلې ولکې لاندې راوستل. له نیمروز څخه را رسېدلي راپورونه وايي، چې د دغه ولایت مرکز زرنج وړمه ورځ په بشپړ ډول د وسله والو طالبانو لاسته لوېدلی دی.
د دغه ولایت ځایي چارواکي او د ملي شورا غړي وايي چې وسله والو طالبانو له څو لورو پر دغه ښار بریدونه پیل کړل، خو په خبره یې امنیتي ځواکونه له کوم اوږده مقاومت پرته له دغه ښاره په شا شوي دي.
بلخوا د نیمروز ولایت پولیس هم تاییدوي چې د دغه ولایت مرکز د وسله والو طالبانو لاسته لوېدلی دی. د یاد ولایت امنیتي چارواکو رویټرز خبري اژانس ته ویلي چې دغه ولایت ته د اضافي سرتېرو نه ورسېدو له کبله دغه ولایت د طالبانو لاس ته لوېدلی او ډېری چارواکي او امنیتي سرتېري ایران ته اوښتي دي. طالبانو هم منلې، چې زرنج ښار د دوی د جنګیالیو لاس ته لوېدلې دی.
تر نیمروز وروسته شبرغان دویم لوی ښار دی چې په تېرو دوو ورځو کې د دغې ډلې له خوا سقوط کېږي. د جوزجان مرستیال والي عبدالقادر مالیه وايي چې ټول افغان امنیتي او دفاعي ځواکونه د دغه ولایت له مرکز څخه وتلي او د شبرغان ښار په بشپړه توګه د طالبانو په کنټرول کې راغلی دی. مالیه زیاته کړه چې د مارشال عبدالرشید دوستم اړوند سیمهییز پاڅونوال هم له ښار څخه وتلي او طالبان د دوستم ۵۰۰ ماڼۍ ته داخل شوي دي. د جوزجان د ولایتي شورا ريیس بابر ایشچي هم ویلي چې اوسمهال ټولې دولتي ادارې د وسله والو طالبانو په کنټرول کې دي.
د جوزجان مرستیال والي او د ولایتي شورا ريیس همدارنګه ویلي چې د دغه ولایت هوايي ډګر هم د طالبانو له خوا نیول شوی دی. یادو چارواکو په دغه جګړه کې افغان سرتېرو ته د اوښتو تلفاتو په اړه څه نه دي ویلي. په ورته وخت کې د افغانستان د کورنیو چارو وزارت ویاند میرویس ستانکزی پر شبرغان ښار د طالبانو بریدونه تايید کړي، خو د دغه ښار د سقوط په اړه یې څه نه دي ویلي.
دا په داسې حال کې ده چې دفاع وزارت وړمه ورځ وویل چې د جوزجان ولایت د مرکز کنټرول د افغان ځواکونو په لاس کې دی او طالبان یې له شبرغان څخه ایستلي دي. د دفاع وزارت مرستیال ویاند فواد امان پر خپل ټویټر پاڼه لیکلي وو: «شبرغان له تروریستانو څخه پاک شو، امنیتي او دفاعي سرتېرو او سیمه ییزو پاڅونوالو طالبانو ته زیاته مرګ ژوبله اړولې ده، د وژل شوو کسانو جسدونه په کوڅو او لارو کې پراته دي.»
بلخوا ارګ وايي چې جمهور ريیس محمد اشرف غني له مارشال عبدالرشید دوستم سره په لیدنه کې د شمالي ولایتونو د امنیتي وضعیت په اړه خبرې کړې دي.
وسله وال طالبان داسې مهال دغه ښارونه سقوط کوي چې ټاکل شوې تر راتلونکو څو اونیو به ټول امریکايي او نړیوال ځواکونه له افغانستانه ووځي.