د طالبانو د نیمروز او جوزجان ولایتونو د مرکزونو له نیولو وروسته د سرپل ولایت د نیولو ادعا هم وکړه. دغه راز د کندوز ښار ډېرې برخې یې هم ونیولې او په تالقانو کې یې هم پرمختګ کړی. حکومتي ځواکونه بیا وايي چې سرپل یې بېرته نیولی، په کندوز کې یې عملیات پیل کړي او په تخار کې یې د طالبانو د پرمختګ مخه ډپ کړې ده. له دې سره حکومتي چارواکي وايي، په هرات او لښکرګاه کې یې هم طالبان په شا تمبولي دي.
د دواړو اړخونو ادعاوې یو لوری، خو څه چې روښانه دي، هغه دا چې څو ښارونه یا د ښارونو لویې برخې لاس په لاس شوې دي. دواړه وايي چې مقابل لور ته یې مرګ ژوبله اړولې، خو تر ګردو ستر زیان خلکو ته اوښتی دی. زرګونه خلک له خپلو کورونو بې ځایه شوي، مرګ ژوبله ور اوښتې، دوکانونه، مارکېټونه او کارځایونه یا نړېدلي او یا هم سوځېدلې دي. په ښارونو کې کوڅه پر کوڅه جګړه او له هوا بمبارۍ تر ګردو زیات ملکي وګړو ته زیانونه اړوي، نو څومره چې جګړې اوږدېږي، سختېږي او په ښارونو کې دوام کوي، په همغه کچه ملکي وګړي زیانمنېږي. دا ستونزه هغه وخت لا زیاته شي چې کله ښارونه لاس په لاس شي او چې څو ځله دا لوبه تکرار شي، نو بیا خو جګړه په واقعیت کې د خلکو پر خلاف شي.
دواړه لوري لا هم پر جګړه ټینګار کوي او د سولې په برخه کې د هېڅ پرمختګ او بدلون څرک نشته. دواړه لوري پوهېږي چې جګړه ستونزه نه حل کوي، لومړۍ خو په دې جګړه کې بریا نشته او که بریا هم وي، پایله یې داسې ده چې دوی ته به زیان اړوي. له بده مرغه له همدې پوهې سره سره په جګړه ټینګار کوي او هڅه کوي چې د زور له لارې حالات بدل کړي. د زور له لارې د یو بل ماتول او یا هم په زور او د یو بل په محوه کولو واک ته رسېدل او بیا یې دوام تکرار شوې ناکامه تجربه ده. اوس هم که طالبان فکر کوي چې په جګړه به حکومت ونیسي، لومړۍ خو دا چاره ناشونې ښکاري، خو که دا کار وکړي، بیا هم طالبان له سختو ستونزو سره مخ کېږي، ځکه د دوی د خپلو متحدینو په ګډون نړۍ بیا بیا دا ویلي چې دوی به هغه حکومت په رسمیت ونه پېژني چې په زور راغلی وي او ګډ کار به ورسره ونه کړي. که حکومت هم فکر کوي چې طالبان به په زور مات کړي، دا هم په شلو کلونو کې ونه شول او اوس هم نه کېږي او نه یې ورسره خلک او نړۍ مني. له همدې امله د زور کارول، دواړو اړخونو ته زیات تاوان لري.
په ښارونو کې جګړه، په زور د ښارونو نیول، په ښارونو کې مقاومت او بمبارۍ په هېڅ ډول د توجیه وړ نه دي. پکار ده چې دا ناوړه جګړه نوره ودرول شي، دواړه اړخونه باید له ضد تېر شي، خبرې پیل کړي او ژر تر ژره پر یو انتقالي حکومت توافق وکړي او دایمې سولې ته لاره هواره کړي.