د سږ کال د اکتوبر ۲۵مه نېټه په ملګرو ملتونو کې د چين ولسي جمهوريت د قانوني څوکۍ د اعاده کېدو له ۵۰مې کاليزې سره برابره وه. د ملګرو ملتونو د سوداګرۍ او پرمختګ شورا پخواني سرمنشي سوپچی (Supachai) څو ورځې مخکې د چین ميډيا ګروپ له خبريال سره په مرکه کې ويلي، چې په ملګرو ملتونو کې د چین ولسي جمهوريت د قانوني څوکۍ اعاده کېدل نړۍ ته د عدالت رول لوبولی او د نړيوالې ټولنې د سولې او ثبات ساتلو لپاره يې ستر خدمتونه ترسره کړي دي.
چين په نړۍ کې تر ټولو لوی پرمختيايي هېواد دی او تل یې د پراخو پرمختیايي هېوادونو د ګټو لپاره غږ پورته کړی دی. دغه راز چین د امريکا په مشرۍ د لوېديځو هېوادونو انحصار ماته کړی او د چين په ګډون سره د ملګرو ملتونو سازمان رښتينی استازیتوب لري او تر یوې اندازې پورې یې نړيوال شکل د عدالت او مساواتو پر لوري روان شوی دی.
پوښتنه دا ده، چې ولې چين د پرمختيايي هېوادونو د غږ پورته کولو زړورتوب لري؟ یو مهم لامل يې دا دی چې د چين اقتصاد په تېرو لسګونو کې ګړندی پرمختګ موندلی، په تېره بيا چین کې د اصلاحاتو او ورخلاصون تګلارو تر پلې کېدو وروسته د اقتصادي زیاتوالی سرعت يې ډېر چټک شوی او د وګړیو د ژوند سویه یې ډېره لوړه شوې ده. د دغه هېواد د حکومت او خلکو په ګډو کوښښونو سره، په ۲۰۲۰م کال کې دغه هېواد کې د سختې بېوزلۍ د له منځه وړلو کارونه بشپړ شوي او له ټاکلي وخت ۱۰ کاله مخکې يې د ملګرو ملتونو تر ۲۰۳۰م کال پورې د دوامدار پرمختګ په اجنډا کې د بېوزلۍ د له منځه وړلو ټاکلې موخه عملي کړې ده. په داسې حال کې چې کرونا وبا په ګردې نړۍ کې ګړندۍ خپره شوې او پر نړيوال اقتصاد يې سخته منفي اغېزه کړې، چین لومړی دغه وبا کنټرول کړې او همدا راز یې اقتصادي احیا پيل کړې. د سږ کال په تېرو ۹ میاشتو کې د چين د کورنیو توليداتو ارزښت له ۱۱.۷ زرو ميليارډو امريکايي ډالرو څخه اوښتی او د تېر کال د همدې مودې په نسبت ۹.۸ سلنه زیات شوی. ويل کېږي چې چين د نړيوال اقتصاد د احیا کېدو لپاره قوي ماشین دی. په عین وخت کې، چین د فضايي تکنالوژۍ، د اقليمي بدلون سره د مقابلې، د بيولوژيکي تنوع ساتلو او د سپورټ په شمول ډېرو برخو کې هم د ليدو وړ پرمختګونه تر لاسه کړي دي. د هېواد عمومي توان يې په دوامداره توګه لوړ شوی او دا په ملګرو ملتونو کې د چين لخوا د پرمختيايي هېوادونو په استازيتوب د غږ پورته کولو لپاره د باور او زړورتوب سرچینه ده.
چین د خپل ځان پرمختګ د موندلو تر څنګ له ډېرو پرمختیايي هېوادونو سره پراخه مرستې هم کړې او تل پر څواړخيز نظام يې ټينګار کړی چې د ګډې سمسورتیا، د دوامدار پرمختګ او د نړيوال نظام د ساتلو په ساحو کې يې مهم رول لوبولی دی. د یو کمربند او یوې لارې او د انسانانو د ګډ برخليک ټولنې د جوړولو وړانديزونه چې د چین د دولت رئيس شي جين پينګ لخوا وړاندې شوي، له نړيوالې ټولنې سره د ښې راتلونکې د جوړولو په اړه د چین نیکې هيلې ښکاري. اوس ۱۴۰ هېوادونو او ۳۲ نړيوالو سازمانونو د یو کمربند او یوې لارې د جوړولو پروژه کې ګډون کړی. بله خوا، چین له ۱۹۹۰ کال راهيسې د ملګرو ملتونو په ۲۵ سوله ساتونکو دندو کې برخه درلودلې چې په عمومي توګه دغو دندو ته څه باندې ۴۰ زره سرتيري يې ورليږلي دي.
د يادولو وړ ده، چې چین هېڅکله د نورو هېوادونو په کورنيو چارو کې مداخله نه ده کړې او پر هېڅ هېواد يې تېری نه دی کړی. چین تل پر سوله ييز پرمختګ ټينګار کړی او خپلې ژمنې يې هميشه پوره کړي دي . د کرونا وبا تر رامنځته کېدو وروسته، چین د دغه وبا ضد واکسين جوړ کړی او په اړه یې څېړنې تر سره کړي او ژمنه يې کړې چې د چين لخوا توليد واکسين به په نړۍ کې عامه توليدات وګرځي. تر اوسه پورې چين څه باندې سلو هېوادونو او نړیوالو سازمانونو ته له ۱.۵ ميليارډه ډوزو زیات واکسين برابر کړی دی، خو په عين وخت کې د امريکا په شمول لوېديځو هېوادونو نږدې ۶ سوه ميلیونه ډوزه واکسين زېرمه کړی دی.
ويل کېږي چې په ملګرو ملتونو کې د چین ولسي جمهوريت د قانوني څوکۍ د اعاده کېدو ۵۰مه کاليزه د دغه هېواد یوه تلپاتې نښه ده، هغه به په راتلونکی کې د نړيوالې ټولنې او انسانانو د عادلانه پرمختګ لپاره لا زیات خدمتونه وکړي.