په غور کې د ډوډۍ د وېش پر سر اختلافات رامنځ ته شوي، وروسته دا اختلافات په لاریون اوښتي او لاریون په تاوتریخوالي بدل شوی دی.
په پېښه کې د مرګ ژوبلې په اړه د نظر اختلاف دی. کورنیو چارو وزارت بیا وایي چې د لاریون کوونکو په لیکو کې وسله وال ځای پر ځای شوي وو او دوی هڅه کوله چې د امنیتي تاسیساتو ترڅنګ پر ولایت مقام هم برید وکړي. د بشري حقونو خپلواک کمېسیون بیا د حکومتي ځواکونو له لوري پر لاریون کوونکو برید غندلی دی.
د کرونا ویروس له خپرېدو سره هممهاله حکومت په ولایتونو کې د عامو بېوزلو وګړو لپاره د ډوډۍ د وېش پروګرام پیل کړی دی. دغه پروګرام سره له دې چې ګټور دی، خو په ټوله کې له نیوکو سره هم مخ شوی دی. خلک شکایت لري چې په دې پروسه کې عدالت په پام کې نه دی نیول شوی او پراخ فساد پکې رامنځ ته شوی دی. د دغو نیوکو تر ټولو مهمه بېلګه د غور ولایت و. په دغه ولایت کې پرون په همدې تړاو لاریون شوی و. لاریون کوونکو ویل چې حکومت بېوزلو ته د ډوډۍ د وېش لړۍ پیل کړې، خو د دغه پروګرام په مدیریت کې ناکام دی. د دوی په وینا، حق حقدار ته نه رسېږي، فساد موجود دی او لا هم زرګونه کورنۍ په سختو شرایطو کې شپې او ورځې تېروي.
لاریون پرون د غور په مرکز کې وشو، تر لږ ساعت وروسته د پولیسو او لاریون کوونکو ترمنځ لاریون پر تاوتریخوالي واوښت. ویل کېږي چې لاریون کوونکو د ولایت مقام او امنیه قوماندانۍ پر تاسیساتو د ډبرو ګزارونه کول. له دې وروسته د امنیتي چارواکو په وینا، پولیسو هم هوایي ډزې کړې چې په پېښه کې دواړو لورو ته مرګ ژوبله اوښتې ده. په ولسي جرګه کې د غور د خلکو استازی ګل زمان نایب وایي، په پېښه کې اووه کسه مړه شوي او څوارلس نور ټپیان دي. د غور د والي ویاند محمد عارف عابر بیا وایي چې په پېښه کې دوه کسه وژل شوي او پنځه نور ټپیان دي.
د کورنیو چارو وزارت بیا د لاریون په اړه بل ډول څرګندونې کوي. د دغه وزارت ویاند طارق ارین وایي، غیر مسوولو وسله والو له لاریون په استفادې خپل کسان د لاریون کوونکو په منځ کې ځای پر ځای کړي وو او دوی پر امنیتي ځواکونو برید کړی دی. د ده په خبره، امنیتي ځواکونو یې په ځواب کې هوايي ډزې کړې دي چې لاریون کوونکو ته تلفات اوښتي دي. ارین همدا راز وایي چې په دې پېښه کې دوه پولیس وژل شوي او لس کسه نور ټپیان دي. د ده په خبره: ((ځینې غیر مسوولو وسله والو د لاریون کوونکو په لیکو کې ځای نیولی و، دوی پر پولیسو برید وکړ، امنیتي ځواکونو هوایي ډزې کړې چې له بده مرغه تلفات دواړو لورو ته اوښتي دي)).
ویاند همدا راز وایي چې په دې پېښه کې لاریون کوونکي هم وژل شوي دي. د نوموړي په وینا، په دغو ډزو کې د یوه سیمه ییز خبریال په ګډون څلور کسه لاریون کوونکي وژل شوي او ۹ کسه نور ټپیان دي.
د بشري حقونو خپلواک کمېسیون هم په دې تړاو غبرګون ښودلی او د پولیسو له لوري یې پر لاریونوالو ډزې بشري جنایت بللی دی. د دغه کمېسیون چارواکو ویلي چې دوی به تر خپلو امکاناتو دغه پېښه په هر اړخیزه توګه څېړي او په اړه به یې وروسته معلومات له رسنیو سره شریکوي. د ولسمشر لومړي مرستیال امرالله صالح هم په دې تړاو غبرګون ښودلی دی. نوموړي ویلي چې دې پېښې سخت خواشینی کړی دی. د ده په خبره: ((په غور کې دغه پېښې متاثر کړی یم، ټولو ته ډاډ ورکوم چې حق حقدار ته رسېږي، موږ د هر فرد په چوپړ کې یو)).
یوازې غور نه دی چې خلک له دغه پروسې ناخوښ دي، په ګڼو ولایتونو ان پلازمېنه کابل کې هم خلک د حکومت له دغه پروګرام ناخوښ دي او وایي چې حق حقدار ته نه رسېږي او حکومت د دې پروسې په ناسم مدیریت تورنوي.