د پاکستان پوځ ویلي چې په بلوچستان ایالت کې د نښتو پر مهال اوه سرتیري او ۱۵ بریدګر وژل شوي دي. د پاکستانیو رسنیو د راپورونو له مخې، د پوځ په اعلامیې کې ویل شوي چې په بریدونو کې څلور سرتیري ټپي شوي هم دي. پاکستان تل په هند تور پورې کوي چې د بلوڅ بیلتون غوښتونکو سره مرسته کوي خو هندي چارواکو دا تورونه رد کړي دي. د راپورنو له مخې، بلوڅانو د آزادۍ پوځ په نامه بیلتون غوښتونکې ډلې ادعا کړې چې په پوځي پوستو بریدونه دوي کړي. دې ډلې په یوې اعلامیې کې ویلي چې برید د هغوی د ځان وژنې قطعې کړی او د لسګونو پاکستاني پوځیانو د وژلو ادعا کړې. دا بریدونه د نوشکي ولسوالۍ کې پر حکومتي ځواکونو شوي، یادې ډلې ادعا کړې چې په دې بریدونو کې د یو افسر په ګډون پکې لږ تر لږه ۱۰۰ پاکستاني پوځیان وژل شوي. خو د پاکستان د پوځ یو جګپوړي غړي دا ادعا درواغ بللې. بلوڅ بیلتون غوښتونکو په دې تیرو څو اوونیو کې د پاکستان په امنیتي ځواکونو بریدونو ته زور ورکړی.
