واک ته د اسلامي امارت له راتګ وروسته بیا بیا پاکستاني چارواکي داسې ښيي چې ګواکي په کابل کې چارواکي د دوی د هدایاتو سره سم عمل کوي او دوی په نړیواله کچه د افغانستان استازیتوب کوي. پاکستاني چارواکي تل داسې ښيي چې په نړیوالو غونډو او د نورو هېوادونو له چارواکو سره په لیدو کې د افغانستان استازیتوب کوي. د افغانستان په کور دننه مسایلو کې هم پاکستان داسې ښيي چې غږ یې اورېدل کېږي، خو واقعیتونه داسې نه دي، نو پاکستاني چارواکي ولې داسې اکټونه کوي چې ګواکي پر افغانستان واکمن دي او یا هم په کابل کې واکمنو ته دوی هدایتونه کوي؟
پر افغانستان د طالبانو د یو ځل بیا واکمنېدو وروسته پاکستان تمه لرله ځیني داسې امتیازونه به تر لاسه کړي چې پخوا یې نه وو تر لاسه کړي. د پاکستاني طالبانو پر ضد ګام اخیستل، له نړۍ سره د پاکستان له لارې د اړیکو تنظیمول، ډیورنډ کرښه منل او یا هم په اغزن سیم بشپړولو کې له پاکستان سره مرسته، په افغانستان کې د پاکستاني افرادو پر دندو ګومارل او د افغانستان هرې سیمې او ادارې ته د پاکستانیانو خلاص لاسرسی هغه څه وو چې پاکستان یې تمه لرله. د اسلامي امارت له څه باندې شپږ میاشتنۍ واکمنۍ وروسته اوس ښکاري چې پاکستان خپلو موخو ته نه دی رسېدلی او ورځ تر بلې ناهیلی کېږي. د اسلامي امارت چارواکو په واضحو ټکو ویلي چې ډیورنډ نه مني او په دې اړه پرېکړه د ولس صلاحیت دی. ددې تر څنګ یې د پاکستان هغه غوښتنه هم په شدت رد کړې چې په اغزن سیم کې دوی ورسره مرسته کوي او ان په ځینو سیمو کې له دې امله نښتې هم شوي دي. په کور دننه مسایلو کې هم پاکستان ته د هغسې لاسوهنې چانس نشته چې دوی یې تمه لرله او پر دندو د پاکستاني وګړو د ګومارنې غوښتنه هم د امارت د چارواکو له خوا په شدت رد شوه. له بله اړخه اسلامي امارت په بهرني سیاست کې هم خپلواک عمل کوي، له هېوادونو سره مخامخ خبرې کوي، سفرونه کوي او د خپلواکو دوه اړخیزو اړیکو لپاره یې له ګڼو هېوادونو سره مهم پرمختګونه هم کړي دي. د پاکستان طالبانو د تسلیمولو په برخه کې هم ورسره اسلامي امارت هېڅ داسې مرسته نه ده کړې چې پاکستان یې تمه لرله، بلکې واک ته د اسلامي امارت له رسېدو وروسته د پاکستاني طالبانو او بلوڅ بېلتونپالو بریدونو هم زور اخیستی دی.
له دې امله چې پاکستان خپلو موخو ته نه دی رسېدلی او ناهیلی شوی دی، نو غواړي وښيي چې لوبه یې نه ده بایللې او لا هم کنټرول لري. دوی له دې لارې درې موخې لري: لومړی؛ لا هم غواړي له نړۍ د افغانستان او طالبانو پر سر امتیازات واخلي. دویم؛ خپلو خلکو ته ښيي چې دوی له طالبانو سره په چلند کې ناکام نه دي. درېیم؛ دا چې دوی غواړي اسلامي امارت ته په کور دننه ستونزې جوړې کړي، کمزوری یې کړي او په افغانانو کې یې د پاکستان تابع معرفي کړي. له همدې امله پر افغانستان د واکمنۍ اکټونه کوي.
اوس اسلامي امارت ته پکار ده چې د پاکستاني چارواکو ددغه اکټونو د بې ارزښته کولو لپاره ګامونه واخلي. اسلامي امارت باید د پاکستاني چارواکو دغه ډول اکټونو، خبرو او دریځونو ته چې پکې دوی د افغانستان د واکمنو په څېر وي، غبرګون وښيي او رد یې کړي. دا په دې مانا نه ده چې سر له اوسه باید د دښمن په څېر چلند ورسره وشي، خو په حکمت سره باید د افغانستان او نړۍ خلکو ته وښودل شي چې پاکستاني چارواکي یوازې تمثیل کوي او واقعیت دا دی چې په کابل چارواکي د پاکستان غوښتنې نه مني او خپلواک عمل کوي.