د افغانستان لپاره د امریکا د بهرنیو چارو وزارت ځانګړي استازي ټام ویسټ ویلي چې له طالبانو سره دیپلوماسي د ټولو په ګټه ده او موږ ټول باید د خپلو ګټو په خاطر له طالبانو سره دیپلوماسۍ ته دوام ورکړو. هغه ویلي چې د نجونو د زده کړو په برخه کې د دوی دیپلوماسۍ پرمختګونه لرل، خو لا هم د ټولګډونه حکومت په برخه کې څه نه دي شوي. هغه ټینګار کړی چې په افغانستان کې باید ټولګډونه حکومت جوړ شي چې ښځې هم پکې وي.
واک ته د اسلامي امارت له رسېدو وروسته د امریکا او لوېدیځو هېوادونو چلند پر فشارونو او بندیزونو ولاړ دی. د دوی دیپلوماسي د فشارونو او بندیزونو دیپلوماسي ده چې بیه یې د افغانستان کړېدلي خلک پرې کوي. امریکا نه یوازې خپله اسلامي امارت په رسمیت نه پېژني، بلکې نورو هېوادونو ته هم اجازه نه ورکوي چې دا کار وکړي. ددې تر څنګ یې د افغانستان څه باندې نهه میلیارده ډالره پانګه کنګل کړې چې ورسره افغانستان له سختو اقتصادي ستونزو سره مخ شوی دی. له دې سره هممهاله امریکا او لوېدیځو هېوادونو د خپلو تبلیغاتي ماشینونو پر مټ د افغانستان پر وړاندې یوه سخته جګړه هم پیل کړې ده. دوی په خلکو کې وېره خپروي، هر څه تور او تیاره ښکاره کوي او د افغانستان یو وېرونکی او ناوړه تصویر نړۍ ته ښيي. تر اوسه پورې د امریکايي دیپلوماسۍ موخه دا ښکاري چې افغانستان باید له اقتصادي ناورین سره مخ، یو منزوي هېواد وي چې نه له نړۍ سره رسمي اړیکې ولري او نه هم پکې داسې اقتصادي کارونه وشي چې د خلکو په ژوند کې مثبت بدلون راشي. د امریکا هر ګام د همدې لپاره دی چې افغانستان لا زیات ولوېږي او افغانان له لا زیاتې لوږې او اقتصادي ناورین سره مخ شي.
امریکا غواړي چې د فشار او بندیزونو له لارې خپلو موخو ته ورسېږي، دا د هغې تګلارې یو بل مخ دی چې امریکا تېر شل کاله په افغانستان کې وکاروله. شل کاله د افغانستان د خلکو وژل، بمبارول، بندي کول او شکنجه کول د امریکا اصلي تګلاره وه او اوس د بندیزونو له لارې غواړي افغانستان منزوي کړي، خلک یې وږي کړي او له ستونزو سره یې مخ کړي. خو امریکا باید پوه شي چې څه ډول یې چې د جګړې تګلاره ناکامه شوه او په ټوله نړۍ کې یې حیثیت او ځواک ته زیان واوښت، دغسې به یې د بندیزونو او فشارونو تګلاره هم له ماتې سره مخ کېږي. په اوسنۍ نړۍ کې دا شونې نه ده چې امریکا دې همداسې په یوازې ځان هره پرېکړه وکړي او نړۍ دې هم تر ډېره ورسره په یوه لاره ولاړه شي. نړۍ به له امریکا لاره بېلوي او امریکا به یو ځل بیا د افغانستان پر وړاندې ماتېږي.
په افغانستان کې به حکومتولي ورځ تر بلې ښه کېږي، حکومت به په واقعي مانا د ټولګډونه حالت لوري ته ځي، مسلکي او تخنیکي خلک به خپلو دندو ته ورګرځي او د ښځو د حقونو په ګډون به د هر افغان اسلامي او قانوني حق ورکول کېږي. د افغانستان ټول خلک به له حکومته راضي کېږي او کله چې ټول خلک له حکومته راضي وي، نو بیا به د امریکا د زور، فشار او بندیزونو تګلارې ناکاره کېږي. له همدې امله پکار ده چې امارت په چټکۍ سره همدغه لوري ته ولاړ شي او په سیاسي ډګر کې هم یوه لویه بریا ولري.