اسلامي امارت په کابل ښار کې د تفریحي پارکونو مسوولینو ته ویلي چې په اونۍ کې درې ورځې به ښځو او څلور ورځې به نارینهو ته ځانګړې کوي. ددې تر څنګ په یو بل ګام کې بهرنیو هېوادونو ته له محرم پرته د ښځو پر تګ هم بندیز لګېدلی دی او نور ښځې نه شي کولای چې د هوايي ډګرونو له لارې له محرم پرته بهرنیو هېوادونو ته سفر وکړي. چارواکي وايي چې دا ګامونه یې د شریعت د پلي کېدو لپاره اخیستې دي.
اسلامي امارت د اشغال ختمول او د اسلامي نظام جوړول خپلې دوې سترې موخې ګڼلې او د همدې لپاره یې شل کاله مبارزه وکړه. له دې دوو وروستیو ګامونو وړاندې یې ځیني نور کارونه هم کړي چې ځینې یې لانجمن شوي دي. د اسلامي شریعت پلي کول په طبیعي ډول د بهرنیانو په ځانګړي ډول د لوېدیځوالو د اندېښنې وړ ګرځي او هغوی پر دغو کړنو سختې نیوکې کوي. په کوردننه خلک بیا د شریعت د پلي کولو ملاتړ کوي، خو ورسره تل دوې اندېښنې شته او هغه دا چې ځیني کارونه د شریعت د پلي کولو پر ځای خلک له ستونزو سره مخ کوي او ځینې بیا داسې دي چې په لومړیتوب کې نه راځي او پکار ده چې تر هغو وړاندې نورو مهمو مسایلو ته پام وشي. د بېلګې په ډول په پارکونو کې د ښځو او نارینهو د ورځو بېلول کوم لومړیتوب نه دی او له بله اړخه اوس که یوه کورنۍ وغواړي چې پارک ته ولاړه شي، نو څه به کوي!؟ یا هم دا چې ښځې د جمعې په ورځ تفریحي پارک ته نشي تللای، په داسې حال کې چې جمعه رخصتي وي او خلک په همدې ورځ تفریح ته ځي. ددې چارې لپاره ښه او اسانه لاره دا وه چې پارکونه په دوو برخو ویشل شوي وای، چې یوې برخې ته یې کورنۍ ورتللای او بلې برخې ته یې یوازې نارینه پرېښودل کېدای. دغه راز بهر ته له محرم پرته د ښځو د تګ مخنیوی هم لانجمنه چاره ده. لومړی خو دا چې محرم یوازې خاوند نه دی، بلکې پلار، ورور، زوی، کاکا، ماما، لمسی او نیکه هم په محرم کې راځي، اوس به دا څوک معلوموي چې له ښځې سره روان کس یې محرم دی او که نه!؟ له بله اړخه که په هوايي ډګر کې دا چاره عملي شي، زموږ ګاونډیو ته به د تګ پر مهال دا چاره څوک او څنګه عملي کوي!؟ بل د لومړیتوب له اړخه تر دې مهمه چاره دا ده چې همدا اوس هره ورځ زرګونه ښځې او نارینه په ډېر ناوړه حال کې په تورخم او چمن کې پر ډیورنډ کرښه اوړي را اوړي، چې نه له شرعي اړخه په مناسب حالت کې دي او نه هم له انساني اړخه او په کار ده چې جدي پام ورته وشي.
د شریعت عملي کول د هر مسلمان افغان غوښتنه ده او پکار ده چې عملي شي، خو لومړیتوبونه باید هېر نه شي او تر څنګ یې باید د شریعت د عملي کېدو په پلمه داسې ګامونه وانه خیستل شي چې د خلکو ژوند له ستونزو سره مخ کړي.