په ایران کې د افغان ګډوالو د ځورولو او له دې هېواده یې په زوره د ایستلو یو پراخ کمپاین پیل شوی دی. که څه هم په ایران کې له وړاندې د افغان کډوالو پر وړاندې تاوتریخوالی و، خو په دې ورځو کې په منظم ډول د افغانانو پر ضد ګامونه اخیستل کېږي. په ځینو سیمو کې دولت خلکو ته ویلي چې افغانانو ته به کور په کرایه نه ورکوي، ځای او کار به نه ورکوي، له هټیوالو او رسټورانټونو غوښتل شوي چې پر افغانانو ډوډۍ او نور توکي ونه پلوري او له موټر چلوونکو هم غوښتل شوي چې افغانان انتقال نه کړي. له دې سره ایراني چارواکي له خپلو خلکو غواړي چې د افغانانو د استوګنې د ځایونو په اړه پولیسو ته معلومات ورکړي. ایراني حکومت هره ورځ زرګونه افغانان نیسي او په زور یې بېرته افغانستان ته راستنوي.
د افغان کډوالو پر ضد د ایراني رژیم دا وروستۍ هڅې د ټولو اسلامي او نړیوالو بشري قوانینو او د ښه ګاونډیتوب خلاف کار دی. دوی له یوه اړخه د اسلام او ښه ګاونډیتوب شعارونه ورکوي، له بله اړخه بیا له افغانانو سره په چلند کې دا دواړه تر پښو لاندې کوي. ایراني چارواکي وايي، هېواد یې د پینځه میلیونه افغان کډوالو کوربه دی، خو ورسره دا نه وايي چې دوی په پینځو میلیونو کډوالو کې یې پینځو ته هم د مسلمانانو او انسانانو په سترګه نه دي کتلي او هغسې چلند یې ورسره نه دی کړی چې یو کډوال ورته اړتیا لري، نړیوال قوانین یې غواړي او تر دې مهمه ده چې د اسلامي ارزښتونو او ښه ګاونډیتوب اړتیا ده. دوی هره ورځ له ځورولو سره مخ دي او په وېره شپې او ورځې تېروي. ځینې یې زندانونو ته اچول کېږي او ځینې یې په داسې حال کې په زوره له ایرانه ایستل کېږي چې آن هلته د خپلو پیسو او شتمنیو د را اخیستو وخت هم ورته نه ورکول کېږي. اوس هره ورځ زرګونه کورنۍ چې پکې ښځې او ماشومان هم وي، په زوره افغانستان ته را اړول کېږي.
د اوس لپاره اسلامي امارت ته په کار ده چې له ایراني چارواکو سره په دې اړه خبرې وکړي او له هغوی وغواړي چې له افغانانو سره دا ناوړه چلند ودروي. ددې تر څنګ هغوی چې هېواد ته را ستنېږي یا په زوره را ایستل کېږي، دلته باید ورسره مرستې وشي او تر هغو چې په افغانستان کې د دوی ژوند عادي کېږي، په پرله پسې ډول باید ورسره همکاري وشي. د کډوالو نړیوال سازمان ته هم پکار ده چې په دې اړه له ایراني چارواکو سره خبرې وکړي او تر څنګ یې په افغانستان کې له را ستنېدونکو او په زوره له را ایستل کېدونکو سره مرستې وکړي او منظم پروګرامونه ورته ولري.
د اوږدې مودې لپاره اسلامي امارت ته پکار ده چې د کډوالو د بېرته را ستنېدو په اړه یوه جامع تګلاره ولري. ددې تر څنګ دوی باید په افغانستان کې کورنی سیاست داسې کړي چې افغانان بېرته خپل هېواد ته راشي او نور له دې کډوالۍ او ذلته خلاص شي.