د اوکراین ولسمشر ولاديمير زلینسکي ويلي چې د امريکا د بهرنيو چارو او دفاع وزيران نن کېیف ته سفر کوي. زلینسکي دا څرګندونې پرون ناوخته په يوه خبري کنفرانس کې وکړې او ويې ويل چې له يادو امريکايي چارواکو سره به پر ځينو مهمو مسايلو خبرې وکړي. دا پر اوکراين د روسيې د بريدونو له پيل وروسته دغه هيواد ته د امريکا د لوړپوړو چارواکو لومړی سفر دی. تر دوی مخکې ځينو اروپايي مشرانو هم کېيف ته سفرونه کړي وو. د اوکراین ولسمشر زليسنکي زیاته کړې ده چې دی به له امریکايي چارواکو سره د هغو وسلو او مهماتو پر څرنګوالي خبرې وکړي، چې اوکراین د روسیې د بې دلیله جګړې په وړاندې ورته اړتیا لري. زلېنسکي تر دې وړاندې د امريکا ولسمشر جوبايډن ته د اوکراين د سفر بلنه ورکړې وه، خو سپينې ماڼۍ ويلي وو چې بايډن د امنيتي ننګونو له کبله اوکراين ته سفر نه شي کولی.
