د امريکا د ملي ډيموکراسۍ صندوق مشر په دې وروستيو ورځو کې د چين له تايوان ولايت څخه ليدنه کړې او غواړي د چين د تايوان په چارو کې لاسوهنه وکړي.
امريکا د ياد صندوق په شمول له ډېرو مرستندويه صندوقونو او مؤسسو څخه ناوړه استفاده او د ډيموکراسۍ په نوم د نړۍ په بېلا بېلو ځايونو کې خپل فعاليتونه او د خپلو ناوړو موخو د تر سره کولو لپاره هڅه کوي او ډېرو هېوادونو ته يې د ګټو پر ځای زيانونه رسولي دي.
د ساري په توګه به يې افغانستان یاد کړو، چې د امريکې د ګټو ښکار شو او په پایله کې يې اوس شا ور ګرځولې ده.د چین د سي اېم جي خبريالې په وروستيو کې د افغانستان د ازمون راډيو له مسؤل جاويد غورځنګ سره مرکه کړې ده.
جاويد غورځنګ په خپلو خبرو کې ويلي، چې امريکا په افغانستان کې د اېن يي ډي په شمول د ډېرو صندوقونو په مټ ناوړه کړنې ترسره کولې او په غير مستقيم ډول يې شوم اهداف ترلاسه کول. سوله او پرمختګ د اوسنۍ نړۍ د وخت عمده موضوع ده، خو حقیقت دا دی، چې امريکا او ځيني نور لويديځ هېوادونه نه غواړي، چې په نړۍ کې سوله راشي او تل د ډيموکراسۍ په نوم د ډيموکراسۍ ضد کړنې کوي او د تش په نوم مرستندويه صندوقونو څخه په استفادې د نورو هېوادونو په کورنيو چارو کې لاسوهنې کوي.
ښاغلی جاويد غورځنګ وايي، چې یو له دغو مؤسسو او صندوقونو څخه د ‘ اېن اي ډي’ صندوق دی، چې د افغانستان په شمول د نړی په سلو هیوادونو کې فعالیتونه لري. دغه صندوق په افغانستان کې د قومي تفرقې، د ښځو ازادۍ، د بشري حقونو د ملاتړ ادعا کوي، خو دا پر خپل ځان بيا نه تطبیقوي.
د امريکې لوی هدف دا دی، چې په افغانستان کې د ترهګریزو فعالیتونو ملاتړ او حمایې ته دوام ورکړي.
د ښاغلي جاويد غورځنګ په اند امریکا له دغه صندوق څخه په استفادې هڅه کوي، چې د افغانستان په شمول د نړی په ډېرو هیوادونو کې مستقیم او یا غیر مستقیم سیاسي، نظامي او اقتصادي حضور ولري، خو د دوی کړنو افغانانو ته ګټې نه، بلکې زیانونه رسولي دي.
نوموړي په مرکې کې ويلي، چې امريکا دغه صندوق د ډیموکراسۍ تر نوم لاندې د همدغو شومو اهدافو لپاره کاروي او په افغانستان کې يې بېلا بېلې پروژې تطبیق کړي او افغانان تر نن ورځې پورې د امریکا د دغو پروژو قرباني دي.
جاويد غورځنګ وايي، چې د امریکا د دغو پروژو له امله د افغانانو کلتور، عنعنات او سیمه ایز راوجونه ورځ تر بلې په خارجي کلتور او عنعناتو بدليږي او کلتور او عنعنات يې ورځ تر بلې کم رنګه کېږي.
امريکايي ډيموکراسۍ په لویه کې افغانستان ته ډېر زيانونه اړولي دي.د امریکا مرستې داسې مثال لري، لکه يو څوک چې نغدې پیسې یا خوراکې مواد، له یو جیب واخلي او بل جیب ته یې واچوي. افغانان د امریکا له مرستو هېڅ نه دي ښېرازه شوي او د دغه هيواد د غیر عادلانه مرستو له وجې يې نړی ته د سوال لاس اوږد کړی دی.
امریکا نه يوازې افغانستان کې، بلکې په چین کې هم د خپلو شومو اهدافو د تطبیق لپاره له همدې ډول صندوقونو یا مؤسساتو څخه استفاده کوي.
د اېن يي ډي صندوق مشر په دې وروستيو کې د چين له تايوان ولايت څخه ليدنه کړې او اعلان يې کړی، چې د تايوان تش په نوم ډيموکراسۍ صندوق سره به همکارۍ وکړي.ښاغلي جاويد غورځنګ په دې هکله وويل، چې تايوان ته د امريکايي چارواکي دغه سفر د چین په داخلې چارو کې ښکاره لاسوهنه ده. چین د اوسنۍ عصري نړۍ د اقتصادي، نظامي او سیاسي قدرت سمبول دی، نو امریکا د چین له اقتصادي، سیاسي او نظامې نفوذ څخه په وېره او ترس کې ده، نو ځکه د چین د تایوان او هانکانګ په چارو کې لاسوهنه کوي.
نوموړی زياتوي، چې ملګري ملتونه باید په دې اړوند د امریکا د جنایتکارو کړنو پر خلاف د نړی د مشرانو یو لویه غونډه تنظیم کړي، ځکه د امریکا د دولتي ډیموکراسۍ صندوق نړيوالو ته زيانونه رسوي.
جاويد غورځنګ د مرکې په پای کې وويل، چې امريکا د ملي ډيموکراسۍ صندوق (NED) له لارې په افغانستان او د نړی د بیلابېلو هیوادونو په داخلې چارو کې لاسوهنه کوي او د ډېرو هېوادونو خلکو ته یې زيانونه رسولي دي. د امريکې دغه کړنې د دې سبب شوي، چې زياتره افغانان اوس له لوږې سره مخ دي او دغه هيواد بايد مجبوره کړای شي، چې له خپلو شومو کړنو لاس واخلي.