د نایجریا چاد ښار ته نږدې په بورنو ایالت کې وسله والو کسانو دېرش ملکي وګړي وژلي دي. راپورونه وایي چې دا پېښه د نایجریا په لودیځ کې د مودو په نامه یو کلي کې رامنځته شوې ده. فرانسې خبري اژانس د یاد ایالت د پولیسو له قوله راپور ورکړی دی چې دا پېښه هغه مهال رامنځته شوه کله چې یو شمېر خلک د داعش ډلې د یو برید په پایله کې د سوځول شویو موټرونو د ضایعاتو پر راټولو بوخت ول. هغه ویلي چې دا کسان مرکزي دولت ته د جاسوسي په تور وژل شوي دي. تر اوسه پورې کومې ډلې د دې برید مسوولیت په غاړه نه دی اخیستی.
