ټاکل شوې چې د امریکا لویې وچې نهمه سرمشریزه غونډه د جون په ۶مه نېټه د متحده ایالاتو په لوس انجلس کې ترسره شي، خو واشنګټن پرېکړه کړې، چې په دغې غونډې کې به کيوبا، وينزويلا او نيکاراګوا ته د
ګډون بلنه نه ورکوي.
د څو امريکايي هېوادونو مشرانو د واشنګټن د يادې پرېکړې له امله پر دغې سرمشریزې غونډې نیوکې کړې دي.
د چارو شنونکي په دې اند دي، چې ښايي ياده سرمشريزه ښې اغېزې ونه لري.
د امریکا سرمشریزه غونډه په لومړي ځل ۱۹۹۴م کال ترسره شوه او دا د متحده ایالاتو دوهم ځل دی، چې د يادې سرمشریزې کوربتوب کوي.
واشنګټن په تېر اپریل کې د ډیموکراسۍ په پلمه د یادو هېوادونو مشرانو ته د امريکې لویې وچې په سرمشريزې کې د بلنې نه ورکول اعلان وکړ، خو دغه کړنه يې د لاتیني امریکا د ځينو هېوادونو له سخت غبرګون او مخالفت سره مخ شوې ده.
د مکسیکو، بولیویا په شمول د ځینو هېوادونو مشرانو ویلي، که واشنګټن د امريکې لويې وچې د ټولو هېوادونو مشرانو ته بلنه ور نه کړي، نو دوی به هم په دغه سرمشریزه کې ګډون ونه کړي.
د بولیوار لیګ ۲۱مه سرمشریزه څو ورځې مخکې ترسره شوه او يوه ګډه اعلاميه يې خپره کړې ده.
د بولیوار لیګ په دغې اعلاميې د امريکا متحده ايالاتو ياده پرېکړه غندل شوې ده.
ياده اعلاميه وايي، چې واشنګټن د امريکا لويې وچې د سرمشریزې غونډې له کوربتوب څخه ناوړه ګټه اخلي او د لاتيني امریکا او د کارابین ځيني هیوادونه يې ګوښه کړي دي.
د لاتيني امریکا ډېرو هېوادونو شک ښودلی، چې دا د امریکا د لويې وچې سرمشریزه ده او که د امريکا هېواد؟
متحده ایالت له ۱۸۲۳م کال راهیسې د لاتيني امریکا د کنټرول په موخه مونرو دوکترين((Monroe Doctrine)) نظریه طرحه او پلې کوي، چې له امله يې د لاتيني امریکا هېوادونه ډېر زیانمن شوي دي.
د امریکا د بهرنیو چارو پخواني وزیر جان کیري د ۲۰۱۳م کال په نومبر کې د امریکا لويې وچې د هېوادونو په یوې غونډې کې وويل، چې د مونرو دوکترين نظریې موده پای ته رسېدلې او متحده ایالت د لاتيني امریکا هېوادونه يو شان همکاران بولي.
حقیقت هېڅ نه دی بدل شوی
متحده ایالت د امریکا د سرمشریزې غونډې له کوربتوب ناوړه ګټه اخلي او غواړي، د لاتیني امریکا ځيني هېوادونه ګوښه وساتي.
د چارو شنونکي پر دې اند دي، چې د واشنګټن د سياستوالو په فکر کې لا هم مونرو دوکترين نظريه شتون لري.
د مکسيکو د ایبلیا پوهنتون د نړیوالو اړيکو کارپوه خاویر لیس په دې اند دی، چې متحده ایالت د امریکا لویې وچې د سرمشریزې غونډې د کوربتوب حق په کارولو سره خپله زورواکي پیاوړې کوي او دغه کړنه يې د یووالي پر ځای هيوادونه سره پاشي او د لاتيني امريکا د هېوادونو هيلې مړاوې کوي، نو ځکه د واشنګټن دغه کړنه د ډېرو هيوادونو له سخت مخالفت سره مخ شوې ده.
د واشنګټن يوه موخه دا ده، چې د لاتيني امریکا پر ځینو هېوادونو فشارونه راوړي، تر څو د چین ضد رویه غوره کړي، خو په دغه شوم نيت کې هم پاتې راغلی دی.
د لاتیني امریکا د هېوادونو موخه مقابله نه ده، بلکې دوی اقتصادي پرمختګ ته اړتيا لري او هڅې کوي، چې خپل اقتصادونه وغوړوي.
د کولمبیا ولسمشر دوک مارکس څو ورځې مخکې د واشنګټن له خبریالانو سره په مرکې کې ویلي، چې هغه په لاتيني امریکا کې د چین پانګونې ګواښ نه بولي او پر متحده ایالت يې غږ کړی، چې له چین سره یو ځای په لاتيني امریکا کې د ستراتيژيکو بنسټیزو تاسیساتو جوړونه وهڅوي.
د ارجنټاین خبري رسنيو د تېر مې په پای کې خبر ورکړی، چې دغه هېواد به د لاتيني امریکا او کارابين هېوادونو لیګ د رئیسه هېواد په حیث یوه سرمشریزه غونډه ترتیب کړي او د امریکا د سرمشریزې غونډې په عین وخت کې به یې ترسره کړي.
که ارجنټاين دغه پلان عملي کړي، نو دا به د متحده ایالت د زورواکۍ پر وړاندې د مبارزې یو پياوړی ګام وي.
د امریکا سرمشریزه غونډه د لاتيني امریکا د ډېرو هېوادونو په مخالفت او احتجاج کې ترسره کېږي.
داسې ښکاري، چې د متحده ایالاتو د یواړخیزې زورواکۍ لمر په ډوبېدو دی.