د ایراني آخوندي رژیم له خوا په سیند کې د ډوبو شوو افغانانو غم لا تازه و، چې ایراني وحشي امنیتیانو یو بل جنایت وکړ او څو افغانان یې وسوځول. لومړۍ هڅه کېدله چې دا پېښه تحریف شي، خو وروسته ویډیوګانې خپرې شوې او آن ایراني چارواکي مجبور شول چې ومني، د دوی ځواکونو پر موټر ډزې کړي او بیا موټر اور اخیستی دی. دا احتمال ډېر دی چې موټر ته به په قصدي ډول اور اچول شوی وي، ځکه چې دومره ډېر اور که بلېږي، نو په موټر کې سپاره کسان د ځان ژغورنې هڅه کوي او شونې نه ده چې داسې دې ټول وسوځیږي.
حکومت بیا د پلاوي او پلټنو خبره کوي، خو اوس دا خبرې داسې دي، لکه د خلکو په زخمونو چې مالګي شیندي. د حکومت د سلګونو او زرګونو پلاوو او پلټنو پایله ورکه ده. همدا څه وخت مخکې لسګونه افغانان د اخوندي رژیم د وحشي ځواکونو له خوا سیند ته وغورځول شول، چې په ټوله نړۍ کې یې غوغا جوړه کړه. زموږ حکومت د پلتڼو او پلاوي خبره وکړه، خو تر ننه څوک پوه نه شول چې پایله څه شوه او آن ایراني چارواکي لا هم وایي چې د ایران په خاوره کې هېڅ داسې پېښه نه ده شوې. دا دی ایراني ځواکونه یو ځل بیا وحشت کوي، خو نور پر حکومت د خلکو باور ختم دی او پلټنې او پلاوي ټاکل ورته بې مانا ښکاري. د حکومت کړنې رښتیا هم پوره بې مانا دي، ځکه چې نه ورسره عدالت تامنیږي او نه هم د دغه ډول وحشتونو مخه نیول کېږي. تر دې دردوونکې خو دا ده چې آن ایراني چارواکي زموږ حکومت او استازو ته هېڅ ارزښت نه ورکوي. په ایراني کې د فرعوني آخوندي رژیم له خوا له دغه جنایت وروسته چې کله د افغانستان سفیر یزد ښار ته د ټپیانو لیدو ته ورغلی، نو آن ټپیان په روغتون کې هم تر څارنې لاندې دي او په لاسونو کې یې هتکړۍ دي. ایراني چارواکو دومره هم نه دي کړي چې د سفیر د ورتګ پر مهال دا هتکړۍ د ټپیانو له لاسونو څخه لرې کړي. دا زموږ د حکومت پر وړاندې د ایراني چارواکو د بې احترامۍ او بې تفاوتۍ اوج دی، چې له بده مرغه لامل یې هم خپله د دغو چارواکو ناسمې تګلارې او کمزوری دریځ دی.
له دې پېښه وروسته یو ځل بیا په افغانستان او بیا د نړۍ په ګوټ ګوټ کې د عدالت غږ را پورته شوی او له افغان حکومت څخه غوښتل کېږي چې دا چاره جدي وګڼي، خو ښکاري چې دا وحشت به هم د تېر په شان هېر شي. له همدې امله پکار ده چې د عدالت لپاره متفاوت ګامونه واخیستل شي. دا ځل باید دا مسأله په نړیواله کچه مطرح شي. ټول افغانان او د بشري حقونو مدافعین باید په نړیواله کچه د دغه وحشت د څېړنې او عدالت لپاره غږ پورته کړي.
په اوږدمهال کې له دغه ډول وحشتونو د خلاصون لپاره موږ یووالي ته اړتیا لرو. د افغانستان ګاونډیان چې له ځان سره د اسلام وروستاړی هم کاروي، زموږ سره د ټولو اسلامي او انساني ارزښتونو خلاف چلند کوي. د دوی د ښه ګاونډیتوب او اسلام ټول شعارونه دروغ دي، نو پکار ده چې موږ نور په خپلو منځونو کې ستونزې ختمې کړو، د سولې پروسه بریالۍ کړو او خپل هېواد ته بېرته یو پیاوړی دولت او خپلو هېوادوالو ته عزت او سرلوړي را وګرځوو.