د چين د مرکزي اقتصادي کارونو کلنۍ غونډه د دسمبر له ۱۵مې تر ۱۶مې نېټې پورې په بېجينګ کې تر سره شوه. په دغه غونډه کې د روان کال اقتصادي کارونو ته بيا کتنه شوې، اوسنی اقتصادي وضعيت تحليل شوی او د ۲۰۲۳م کال لپاره اقتصادي کارونه ترتيب شوي دي. نړيوال د چين اقتصادي کارونو ته ډېره ځانګړې پاملرنه کوي. په دغه غونډه کې پر دې ټيڼګار شوی، چې چین به په راتلونکي کال کې د اقتصاد ثبات ته لومړيتوب ورکړي او د ثبات ساتلو پر بنسټ به پرمختګ وموندل شي، د اقتصاد کيفيت به په اغيزمنه توګه لوړ شي، د اقتصاد اندازه به په معقوله توګه زياته شي او په هراړخيزه توګه به د عصري سوسياليستي هېواد د ابادۍ لپاره نوی پيل رامنځته شي. دغو ټولو څرګندونو د راتلونکي کال اقتصادي کارونه روښانه کړي او دا د ټولې نړۍ لپاره يو ښه خبر دی.
د دې غونډې په راپور کې ويل شوي، د اقتصاد د عمومي وضعيت د ښه والي هڅونه به وشي او راپور کې ۳۱ ځلې د”اقتصادي ثبات“ يادونه شوې. د کورنيو او بهرنيو څيړنو له مخې په ۲۰۲۲م کال کې د نړيوال اقتصاد د پرمختګ سرعت په څرګنده توګه ورو شوی او د اټکل له مخې، په ۲۰۲۳م کال کې به د نړيوال اقتصاد پرمختګ سوکه شي. نړيوال بانک د روان کال په جون کې اټکل وکړ چې د ۲۰۲۳م کال نړيوال اقتصادي وده به ۳٪ وي، خو دغه بانک پدې وروستيو ورځو کې دغه اټکل ٪ ۱.۹ ته راټيټه کړی دی. په دې حال کې د نړۍ د دويم لوی اقتصاد په توګه د چين د اقتصاد ثابت پرمختګ ستر اهميت لري.
د چين اقتصاد اوس لا هم له زياتو ننګونو سره مخ دی، مثلا د اقتصاد د بيا احيا کېدو بنسټونه ټينګ نه دي او پر اقتصاد فشارونه لا زيات دي. خو بايد دا هم وکتل شي، چې د چين اقتصاد قوي دی، ستر بالقوه توان لري او د بېلا بېلو اغيزمنو تګلارو له امله لاسته راوړنې لري، نو ځکه په راتلونکي کال کې ښايي د چين عمومي اقتصاد کچه بيا لوړه شي. په وروستيو ورځو کې په چين کې د کرونا وبا د وقايي او کنټرول تدبيرونه تنظيم شوي او د چين د جه جيانګ، جيانګ سو او سی چوان په شمول د ډېرو ولايتونو سوداګريز پلاوي د بهرنۍ سوداګرۍ د تقويه کولو او د پانګونو د راجلبولو په موخه نورو هېوادونو ته تللي دي.
په ياده غونډه کې پر دې ټيڼګار شوی، چې د راتلونکي کال د اقتصادي کارونو لپاره بايد په شپږو برخو کې همغږۍ وشي او لومړی بايد د کرونا وبا د کنټرول او د اقتصادي او ټولنيز پرمختګ چارې همغږې شي. له دې څخه ښکاري، چې ښايي د چين اقتصاد په چټک ډول بيا پرمختګ وکړي او د نړيوال اقتصاد د پرمختګ انجن به قوي شي.
بهرنيو خبري رسنيو ویلي، چې د يادې غونډې له مخې، د چين په دننه کې د کورنيو اړتياوو پراخولو او د مصرف زياتولو ته به لومړيتوب ورکړل شي. په چين کې د کورنيو اړتياوو زياتول به هرو مرو د چين لوی بازار ته د بهرنيو تصديو د ننوتلو په ترڅ کې فرصتونه جوړ کړي او د چين بازار به د نړيوال مشارکت بازار وګرځي.
همداراز په غونډه کې ویل شوي، چې د باکیفیته پرمختګ موندل په هراړخيزه توګه د عصري سوسياليستي هېواد د آبادۍ لپاره لومړۍ مهمه دنده ده. د باکيفيته پرمختګ لپاره نوښت تر ټولو مهم انجن دی. د پوهنې ملکيت حق نړيوال سازمان په تېر سپتمبر کې د ۲۰۲۲م کال لپاره د نوښت نړیوال ګراف خپور کړ، چې له مخې يې چين لسم مقام خپل کړی او د نوښت ځواک يې په مسلسلو لسو کلونو کې په ثابته توګه لوړ شوی دی.
ورخلاصون د يادې غونډې يوه بله مهمه موضوع وه. په دغه غونډه کې راغلي چې چين به د لوړې سويې پر ورخلاصون ټينګار وکړي او د ورخلاصون لپاره به اړوند قوانين، ميکانيزمونه، اداري لارې چارې او معيارونه تنظيم کړي، څو لا زياتې بهرنۍ پانګونې راجلب او وکارول شي. چين پدې اړه يو لړ تدبيرونه نيولي، چې بهرنيو پانګو ته به لا پراخې او ثابتې زمینې برابرې کړي.
د چين پرمختګ د نړۍ له پرمختګ سره ټينګ تړاو لري او د نړۍ پرمختګ چين ته اړتيا لري. د روان کال په پای کې د چين د کمونېست ګوند له شلم ملي کانګرېس وروسته د مرکزي اقتصادي کارونو غونډه تر سره شوې او نړۍ ته يې د چين د اقتصاد قوی توان، د بازار بالقوه توان، د نوښت فعال قوت او د ورخلاصون د راجلبولو توان ښودلی دی.