د روسيې ولسمشر ولاديمير پوتين د چين ولسمشر شي جين پينګ ته ویلي چې غواړي د دواړو هېوادونو ترمنځ پوځي همکارۍ زياته شي او د لويديځ د نفوذ پر وړاندې د دواړو هېوادونو د هڅو ستاينه يې وکړه. پوتین د ویډیو کنفرانس له لارې په خبرو کې شي جين پينګ ته ویلي، هدف يې د روسیې او چین د وسله والو ځواکونو ترمنځ د همکارۍ پیاوړتیا ده. پوتین همداشان خپل چینايي سیال ګران دوست بللی دی. نوموړي زیاته کړې چې د مخ پر زیاتیدونکي جیوپالیتیک کړکېچ په برخه کې، د روسیې او چین ترمنځ د ستراتیژیک مشارکت اهمیت د ثبات لامل دی. په داسې حال کې چې لویدیځ هیوادونه د روسیې په تیلو او ګازو باندې خپله تکیه راکموي، پوتین په آسیا کې د انرژۍ بازارونو ته سترګې په لار دی.
