د افغانستان د ازادو رسنیو ملاتړ اداره یا نی وايي، په تېر څه باندې یو کال کې سلګونه خبریالانو او د رسنیو کارکوونکو دندې له لاسه ورکړي او۵۰ سلنه انځوریزو، ۴۸ سلنه غږیزو، ټولو چاپي رسنیو او ۸۰ سلنه خبري اژانسونو او انلاین رسنیو خپل فعالیتونه درولي یا محدود کړي دي. نی په خپل کلني راپور کې ویلي، چې ۲۰۲۲ کال کې د ۲۰۲۱ کال په پرتله د خبریالانو پر وړاندې د تاوتریخوالي پېښې ۱۷ سلنه کمې شوې دي. راپور زیاتوي، په تېر یو کال کې د خبریالانو او رسنیو د کارکوونکو پر وړاندې د تاوتریخوالي ۱۳۲ پېښې ثبت شوې ، په داسې حال کې چې تېر کال د نی ادارې له خبریالانو سره د تاوتریخوالي ۱۵۹ قضیې ثبت کړې وې.
