ولسمشر غني د خپلې تازه پرېکړې له مخې د ټولیزو رسنیو د قانون طرحه بېرته له پارلمان راغوښتې ده. د راپورونو له مخې، د بهرنیانو او رسنیو تر فشار وروسته ولسمشر پرېکړه کړې چې دغه طرحه بېرته راوغواړي او د ولسمشر دویم مرستیال به د رسنیو له استازو او مسوولینو سره پر دغه مسئله لا ډېر کار کوي. رسنیو د ولسمشر دغه کار چې له مخې به یې د ټولیزو رسنیو قانون تعدیل کېدلو، د رسنیو، بشري حقونو او نورو بنسټونو له غبرګون سره مخ شو. تازه پرېکړه هم د رسنیو او بشري حقونو د فعالینو له مشرانو سره مخ شوې ده.
له څو ورځو راهیسې په رسنیو کې په دې تړاو راپورونه خپرېدل چې ارګ غواړي د ټولیزو رسنیو قانون تعدیل کړي او ځینې محدودیتونه رامنځ ته کړي. د دغې طرحې له مخې، رسنیو باید د خپلو خبرونو سرچینې د با صلاحیته محکمې له امر پرته پولیسو، څارنوالانو او د امنیت کسانو ته افشا کړي. همدا راز به د حکومت له لوري د دوی بهرنۍ خپرونې څارل کېږي او سانسور کېږي. همدا راز بله برخه یې دا وه چې د رسنیو د لغوې شرایط به اسانه کېږي. دې مسئلې د رسنیو د مسوولینو اندېښنې پارولې وې او دوی حکومت پر دې تورن کړ چې هڅه کوي د رسنیو پر نشراتو محدودیتونه وضع کړي.
د بشري حقونو خپلواک کمېسیون هغه مهال د حکومت پر دې کار غبرګون وښود. دغه کمېسیون وویل چې د بیان ازادي په وروستیو کلونو کې تر ټولو ستره لاس ته راوړنه ده چې باید له محدودیت او بندیز سره مخ نه شي. دغه کمېسیون پر حکومت غږ کړی چې د بیان ازادي دې مهمه وبولي، محدودیتونه دې لري کړي او د دغه مهم رکن په لا پرمختګ کې دې هڅه وکړي.
د افغانستان پر شفافیت د څار بنسټ هم ویلي وو، داسې ښکاري چې افغان حکومت هڅه کوي پر رسنیو محدودیتونه وضع کړي او دغه مهم اصل له خنډونو سره مخ کړل. د دغه بنسټ مشر همدا راز له حکومت غوښتي وو چې د رسنیو د محدودولو پر ځای دې د رسنیو د ودې لپاره کار وکړل شي.
اوس ولسمشر د بهرنیانو او رسنیو تر فشار وروسته دغه طرحه بېرته له پارلمان را بللې ده. د ارګ له مطبوعاتي دفتره په خپره شوې خبرپاڼه کې راغلي چې تېره ورځ د ولسمشر غني په مشرۍ د کابینې غونډه وشوه او په هغه کې د نورو ګڼو مسایلو تر څنګ د ټولیزو رسنیو د قانون د تعدیل پر طرحه هم خبرې شوې دي. د ولسمشر دویم مرستیال د دغه قانون په اړه معلومات ورکړي دي او په وینا یې، دوی دغه طرحه پارلمان ته استولې ده. ولسمشر غني په دې غونډه کې لارښوونه کړې چې د بیان ازادۍ ته د درناوي لپاره دغه طرحه بېرته راغواړي. ولسمشر په پارلماني چارو کې ددولت وزارت ته لارښوونه کړې چې طرحه دې بېرته له پارلمان راوغواړي.
ولسمشر ویلي چې دا مسئله د رسنیو د مسوولینو د اندېښنې سبب شوې وه چې باید بېرته را وغوښتل شي. د ارګ په مطبوعاتي اعلامیه کې راغلي دي: ((کابینې پرېکړه وکړه چې په پارلماني چارو کې د دولت وزارت دې یاده وړاندیز شوې طرحه بېرته له پارلمان څخه وګرځوي)).
د دې تر څنګ کابینې پرېکړه کړې چې د رسنیو ټولې اندېښنې دې راټولې کړل شي او د ولسمشر دویم مرستیال به د دغه قانون په اړه د رسنیو له مسوولینو سره خبرې کوي. د خبرپاڼې له مخې، پر دغه طرحه به لا ډېرې خبرې کېږي او لا به دقیق کېږي.
د رسنیو مسوولینو هم ددغه پرېکړې هرکلی کړی دی او هیله یې څرګنده کړې چې حکومت دې د بیان ازادۍ د ودې لپاره لا ډېر ګامونه اوچت کړي او د خبریالانو او رسنیو په خوندیتوب کې دې مرسته وکړي.