امريکا ځيني چيني شرکتونه له روسیې سره په مرستو تورن کړي دي.
د چين د بهرنيو چارو وزارت وياندې ماو نينګ د جنورۍ په ٣٠مې نېټې په يوې خبري ناستې کې يو ځل بیا پر دې ټينګار کړی، چې چين د اوکراين کړکېچ په اړه غلی نه شي پاتې کېدای، پر اور به تېل ونه شيندي (د حالاتو د سختېدو هڅې نه کوي) او له دغه بحران څخه به هيڅ ګټه وا نخلي.
یوه خبریال په يادې ناستې کې له اغلې ماو څخه پوښتلي:(( د امريکا حکومت په ډاګه کړې، چې د چین ځینې دولتي تصدۍ ممکن د اوکراین پر وړاندې روانې جګړې کې روسیې ته اقتصادي مرستې چمتو کوي.))
اغلې ماو د خبريال يادې پوښتنې ته په ځواب کې ويلي، چين د اوکراين مسئلې په اړه يو هدفمند او عادلانه دريځ ساتلی، تل يې د سولې پلوي کړې او د اوکراين کړکېچ د سياسي هواري لپاره يې رغنده رول لوبولی دی.
نوموړې ويلي، امريکا د اوکراین کړکیچ جوړونکې او تر ټولو لویه متحرکه قوه ده، اوکراین ته پر له پسې سپکې او درندې وسلې ليږدوي او دا کړنې يې د دې لامل شوي، چې ياده جګړه شدت پيدا کړي او نوره هم وغځيږي.
نوموړې زياته کړې، چې امريکا خپلو ناسمو کړنو ته په سم نظر نه ګوري، خو له کوم دلیله پرته يې پر چین شک ښودلی او تور يې پرې لګولی دی.
ماو ويلي، چې چين به دا ډول بې بنسټه تورونه او د امريکا هغه کړنې، چې په غیر منطقي ډول د چیني شرکتونو مشروع حقونو او ګټو ته زیانونه رسوي، و نه مني.
نوموړې زياته کړې، که امريکا په حقيقت کې د اوکرایین د خلکو ژوند او خوندیتوب ته پام کوي، نو ژر تر ژره دې د وسلو ليږد ودروي او له جګړې څخه دې ناوړه ګټه نه اخلي.
ماو ويلي، چې امريکا دې په مسؤولانه توګه د وضعیت ښه والي ته وده ورکړي او د سوله ييزو خبرو اترو لپاره دې یو ښه او مناسب چاپېریال رامنځته کړي. (ژباړه: شکريه)