د امريکا حکومتي ادارو، سياستوالو او خبري رسنيو په دې وروستيو کې يو ځل بيا د چين د بدنامولو په موخه د کرونا وبا د ريښې د لټون په اړه زاړه غږونه راپورته کړي.
وال سټريټ ژورنال څو ورځې مخکې د يوه هغه راپور په قول، چې د امريکا د انرژۍ وزارت له خوا سپينې ماڼۍ او کانګرس ته وړاندې شوی، خبر ورکړ چې” د کرونا وبا ممکن د چين له لابراتوار څخه خپور شوی وي. “ ورپسې د امريکا لويو او مهمو خبري رسنيو همدغسې خبرونه خپور کړل او په چين کې د امريکا سفير بورنس او د امريکا د تحقيق فدرالي ادارې مشر کريستوفر رای يو پر بل پسې ورته خبرې وکړې. د خندا وړ ټکی دا دی، چې د امريکا د انرژۍ وزارت خپل دغه راپور ته د ټيټ باور درجه ورکړې، ځکه د دغه راپور معلومات نيمګړي او شکمن دي او دقيق استدلال نه شي برابرولی. دا ښيي، چې امريکا له شهادت پرته تش په نوم راپور د دغه هېواد لويو خبري رسنيو ته ورکړی او د دې راپور له لارې يې د کرونا وبا د سرچينې په اړه بې ځايه معلومات خپاره کړي.
دا لومړی ځل نه دی چې امريکا د کرونا وبا د سرچينې په اړه چين ته د بې ځايه تور د لګولو هڅې کړې. د امريکا حکومت په ۲۰۲۱م کال کې له استخباراتي ادارې څخه غوښتنه وکړه، چې په ۹۰ ورځو کې د کرونا وبا د ريښې او سرچينې د لټون تش په نوم راپور جوړ کړي. په دغه جوړ شوي راپور کې د “ممکن” په څېر کلېمې ډېرې دي او نړيوالې ټولنې وويل، چې دغه راپور هېڅ د باور وړ معلومات نه دي وړاندې کړي.
د امريکا د ۲۰۲۱م کال سياسي ډرامه ناکمه شوې، نو ولې دغه هېواد يو ځل بيا ورته زړه موضوع راپورته کړې؟
نيويارک ټايمز يادې پوښتنې ته ځواب ورکړ، چې وايي، (( زهرناک سياست)) د امريکا د دغې کړنې سبب دی. د روان کال په پيل کې د امريکا د استازو مجلس منتخب مشر کيون مکرسي له لوړې وروسته په خپله لومړۍ وينا کې وويل، چې د کرونا وبا د ريښې د لټون پلټنه به پيل کړي. ويل کېږي، چې د جمهوريپال ګوند د استازو مجلس له کنټرول وروسته هڅه پيل کړې، چې د کرونا وبا د ريښې لټون په اړه د سياسي غوښتنې له لارې د چين پر ضد کلکه رويه وښيي، څو له ډيموکرات ګوند سره سيالۍ کې مخکښ شي.
په امريکا کې د چين پر ضد نظريې تش په نوم سياسي دسيسې دي او رښتينی غږ نه دی. د روانې مياشتې په پيل کې د امريکا د استازو مجلس د کرونا چارو کمېټې د کرونا وبا د سرچينې په اړه د ګواهي اورېدلو لومړۍ ناسته تر سره کړه. ځينو برخه والو کارپوهانو وويل، چې په دغه ناسته کې له لابراتوار څخه د کرونا وبا د خپرېدو پرته پر نورو نظريو بحثونه د منلو وړ نه وو.
سربېره پر دې، د امريکا حکومت د خپلو دندو د بې غورۍ د پټولو لپاره د کرونا وبا د ريښې لټون مسئله کارولې. اوس امريکا د ډزو پېښو د ډېروالي، نژادي توپير د سختوالي او د پولي تورم د لوړالي او د پولي بازار د ناآرامۍ په شمول له ډېرو ستونزو سره مخ ده او امريکايي سياستوال د دغه وضعيت پر وړاندې د خلکو د پاملرنې اړول غواړي.
د چين په اړه د امريکا ستراتيژيکې اندېښنې له دغه سياسي ډرامې څخه په ډاګه شوې دي. امريکا د سړې جګړې د مفکورې او پر چين د ناسمې پېژندنې له امله چين خپل لومړی سيال بللی او په هره برخه کې يې د چين د پرمختګ د مخنيوي لپاره هڅې کړې او کوي يې چې پر چين د بې ځايه او بې بنسټه تورونو لګول د امريکا يوه طريقه ده.
امريکا په تېرو دريو کلونو کې د کرونا وبا د وقايې په چارو کې ډېر شکمن ګامونه پورته کړي، هېڅکله يې د روغتيا نړيوال سازمان د کارپوهانو ډلې ته د کرونا وبا د ريښې لټون په اړه د همکارۍ بلنه نه ده ورکړې او د کرونا وبا د خپرېدو وختي معلومات يې نه دي خپاره کړي. د امريکا د فورټ ډيټريک لابراتوار، د شمالي کارولاينا پوهنتون بيولوژيکی لابراتوار او د نړۍ په نورو هېوادونو کې د امريکا څه باندې ۲۰۰ بيولوژيکی لابراتوارونه د نړيوالې ټولنې له شکونو سره مخ دي. امريکا بايد د نړيوالې ټولنې پلټنو ته دغه لابراتوارونه پرانيزي.
د ويروس د ريښې لټون علمي کار دی او بايد تر سياسي لاسوهنې لاندې نه ځي. امريکا دغې مسئلې ته د سياسي رنګ ورکولو له لارې خپلې ستونزې نه شي حلولی.