د فرانسې ولسمشر ايمانويل مکرون د اپرېل په اوومې نېټې پر ټولنيزو رسنيو په چيني، انګليسي او فرانسوي ژبو ليکلي، که مونږ همکارۍ وکړو، نو روښانه اينده به ولرو. تل دې وي د چين او فرانسې دوستي.
د بريټانيې فايننشل ورځپاڼې په همدې ورځ د ځينو څېړونکو په قول ويلي، چې تېرې اوږدې مودې ته په کتو، چين ته د مکرون دغه سفر نه يوازې د اقتصادي همکاريو د پياوړتيا، بلکې د اوکراين کړکېچ د حل وفصل لپاره هم مثبت اهميت لري.
د مکرون دا درېیم ځل و، چې د فرانسې د ولسمشر په توګه يې له چين څخه ليدنه وکړه او د چین دولت رئيس شي جين پینګ د اپرېل له پنځمې نېټې څخه تر اوومې نيټې پورې په بېجينګ او ګوانګ جو ښارونو کې د نظريو باکيفيته تبادلې ورسره کړي، چې له امله یې د دواړو هېوادونو متقابل تفاهم او باور لا ټينګ شوی او راتلونکی همکاريز لوری یې روښانه شوی دی.
چين او فرانسې د دواړو سیالانو له لېدنې وروسته يوه ګډه اعلاميه خپره کړې، چې پکې د سياسي ډيالوګ د پياوړتيا، د نړيوال امنيت او ثبات د ساتلو، د اقتصادي تګ راتګ د زياتوالي، د کلتوري تبادلې د بيا پيل او د نړيوالو ننګونو پر وړاندې ګډې مبارزې ټينګار شوی دی.
د چين او فرانسې مشرانو د خپلمنځي ستراتيژيکو همکاريو په هر اړخيزو اړيکو کې د نويو لاسته راوړنو د تر لاسه کولو لپاره هلې ځلې کړې دي.
په لوېديځ کې فرانسه لومړی هېواد دی، چې له نوي چين سره یې نه يوازې رسمي ډيپلوماتيکې اړيکې ټينګې کړي، بلکې له دغه هېواد سره ستراتيژيکې همکاريزې هراړخيزې اړيکې او د ستراتيژيک ډيالوګ ميکانيزم هم لري، نو ځکه دواړه هېوادونه د ډېرو مسئلو په هکله ګډ نظرونه لري او پر خپلواکې ډيپلوماسۍ ټينګار او له څو اړخیزم او ازادې سوداګرۍ څخه ملاتړ کوي، چې همدا ياد ټکي يې د دوه اړخيزو اړيکو د عمومي ثبات د ساتلو سبب شوي دي. رئيس شي جين پینګ له خپل فرانسوي سیال سره په خبرو کې ثبات د چين او فرانسې ترمنځ د اړيکو څرګنده ځانګړنه او قيمتي شتمني بللې ده.
نړيوال حالات اوسمهال له نامعلوم او ناڅرګند برخليک تيريږي. چين او فرانسه د ځاني سوداګرۍ غوښتونکې او يو اړخيزم مفکورو له ننګونو سره مخ دي او بايد د اقتصادي پرمختګ او د خلکو د ژوند د تضمين لپاره هڅې وکړي. دواړه هېوادونه د اوکراين کړکېچ او د ايران اټومي تړون مسئلې د حل وفصل په شمول ډېرو نړيوالو او سيمه ييزو مسئلو کې ورته نظرونه لري.
باور دا دی، که چين او فرانسه د دوه اړخيزو اړيکو ثبات وساتي او لا زياتو ګډو نظريو ته ورسيږي، نو به نه يوازې د دواړو هېوادونو، بلکې د چين او اروپا ترمنځ د اړيکو د پرمختګ او د نړيوالې سولې او ثبات د پرمخبيولو لپاره هم ګټور وي.
د چين او فرانسې د مشرانو د لېدنې پايلې ته په کتو، په نوې زمانې کې د دواړو لوريو ترمنځ ګډ نظرونه ډېر شوي او همکاريزې ساحې يې هم پراخې شوې دي، چې په دې جملې کې يې د دوه اړخيز ډيالوګ د ميکانيزم بيا پيل د پاملرنې وړ دی.
د کرونا وبا له امله، د چين او فرانسې د ستراتيژيکو، اقتصادي، پولي او کلتوري تبادلو په شمول د خبرو اترو درې لوړ پوړي ميکانيزمونه ځنډيلي دي او اوس دواړو مشرانو هوکړه کړې، چې دغه ميکانيزمونه به بيا او په روان کال کې به نوې غونډې تر سره کړي. دواړو مشرانو د متقابل ملي حاکميت، خاورو بشپړتيا او کليدي ګټو ته پر درناوي هم ټينګار کړی دی.
فرانسوي ولسمشر د يو چين د پېژندلو پر اصل بيا ټينګار او تاکيد کړی دی او دغو څرګندونو يې د دواړو هېوادونو د متقابل باور ښه ښکارندويي کړې ده.
د اقتصادي او سوداګريزو همکاريو پياوړتيا چين ته د مکرون د سفر بله مهمه لاسته راوړنه بلل کیږي.
چين د چيني شکله عصري کېدو د پرمخبيولو لپاره هڅې کوي او د فرانسې په شمول د نړۍ د نورو هېوادونو لپاره يې ډېر فرصتونه برابر کړي دي. له مکرون سره په دغه سفر کې څه باندې شپېتو فرانسوي صنعتګرو ملګرتيا کوله، چې په ترڅ کې يې ۳۶ چيني او فرانسوي تصديو ۱۸ همکاريز تړونونه لاسليک کړي دي.
يو فرانسوي متل دی وايي، مرغۍ ګام په ګام خپله ځاله جوړوي.
راتلونکی کال به د چين او فرانسې ترمنځ د سياسي او ډيپلوماتيکو اړيکو د ټينګېډو له شپېتيمې کاليزې سره برابر وي.
عامه باور دا دی، چې د چين او فرانسې د مشرانو تر لارښوونې لاندې به، د دغو دواړو هېوادونو دوه اړخيزې اړيکې نوي پړاو ته داخلې شي او خپلمنځي اړيکې به یې نوی پرمختګ ومومي.