هندوراس د منځنۍ امریکا یو مهم هېواد دی او د سږ کال د مارچ په ۲۶مه نېټه يې تازه له چین سره ډيپلوماتیکې اړیکې ټينګې کړې، دغه راز هندوراس ۱۸۲م هېواد دی چې له چین سره يې رسمي اړیکې ټينګې کړې دي.
د هندوراس ولسمشرې اریس شیومارا کاسترو د جون په ۱۲مه نېټه چین ته په رسمي سفر پيل کړ. د چین د دولت رییس شي جين پينګ ورسره کتنه وکړه او د دواړو مشرانو په حضور کې دواړو خواوو په مختلفو ساحو کې د همکارۍ او تفاهم ۱۷ یادښتونه لاسلیک کړي دي.
د هندوراس د بېلا بېلو رسنیو په ویبپاڼو کې د جون په ۱۳مه نېټه د نوي تاریخي پړاو د پيلېدو پيغام خپور شوی، او پکې راغلي چې هندوراس له چین سره د یو کمربند او یوې لارې د ګډې جوړونې د تفاهم یادښتونه لاسلیک کړل، دغه هېواد ته به د پرمختګ نور ګټور فرصتونه راوړي.
د چین او هندوراس ترمنځ د سیاسي اړیکو ټينګېدو یوازې دوه نیم میاشتې وروسته، د هندوراس ولسمشرې چین ته رسمي سفر پيل کړ. له دې څخه ښکاري، چې دواړه هېوادونه د خپلمنځي اړیکو د ټينګښت لېوالتیا لري.
د هندوراس د بهرنیو چارو وزیر ایدواردو رینا د هندوراس او چین ترمنځ د اړیکو راتلونکي په اړه وویل، د دواړو هېوادونو اړیکې لکه یوه ونه او د ګړندۍ ودې په حال کې دي.
د دغې لويې ونې بنسټ سیاسي متقابل باور دی، چین او هندوراس د یو چین پېژندنې اصولو پر بنسټ خپلمنځي ډيپلوماتیکې اړیکې ټينګې کړې، دا د دواړو خواوو اړیکو د ټينګښت سیاسي بنسټ هم دی. شي جین پينګ له ولسمشرې کاسترو سره په کتنه کې د یو چین پېژندنې پر اصولو بیا ټينګار کړی او باور يې څرګند کړ چې هندوراس به دغه اصول جدي مراعات کړي. ولسمشرې کاسترو ژمنه وکړه چې هندوراس د یو چين پېژندنې له اصولو کلک ملاتړ کوي او جدي رعایت ته یې ژمنه ده. سربېره پر دې، هندوراس د خپل هېواد د یووالي د عملي کولو لپاره د چین له ټولو کوښښونو څخه ملاتړ کوي.
د چین او هندوراس د اړیکو ټینګښت ښه بنسټ لري، نو د دواړو خواوو اړیکې د ګړندي پرمختګ په حال کې دي. د چین د ګمرکاتو ادارې شمېرې ښيي، چې د سږ کال په لومړیو ۴ میاشتو کې پر چین د هندوراس صادرات ډېر ورزیات شوي او د تېر کال د همدې مودې په نسبت ۲۰۶ سلنه زیاتوالی ښيي. په عین وخت کې د دواړو خواوو سوداګریز ارزښت د چټک زیاتوالي په حال کې دی.
ولسمشرې کاسترو چین ته د سفر په ترڅ کې د برېکس هېوادونو د نوي پرمختګ بانک کې د ګډون غوښتنلیک وړاندې کړ، دواړو خواوو موافقه کړې چې د خپلمنځي ازاد سوداګریز تړون په اړه خبرې اترې ژر تر ژره پیل کړي، د یو کمربند او یوې لارې د ګډې جوړونې په شمول د همکارۍ او تفاهم یو لړ یادښتونه يې لاسلیک کړل، د ګډې اعلاميې په خپرولو سره يې ګډې نظریې راغونډې کړې دي. دواړو مشرانو د دواړو هېوادونو ترمنځ د اړیکو پرمختګ پلان ټاکلی، چې خپلمنځي تبادلې او همکارۍ به پياوړې کړي او د دواړو هېوادونو خلکو ته به لا نورې زیاتې ګټې ورسول شي.
هندوراس له چین سره همکارۍ او تبادلې د ژورتیا لېوالتیا لري. ولسمشرې کاسترو وویل چې هغه د هندوراس خلکو د هیلو په پوره کولو سره چین ته راغلې ده.
هندوراس په تېرو څو سوو کلونو کې له خپل شمالي ګاونډي سره د ګډ ژوند په ترڅ کې تل ځپل شوی او د غیر مساواتو پياوړي احساسات يې لرلي. خو چین تل خپل ملګري مساوي ګوري او له هېڅ سیاسي شرط پرته ورسره يې همکارۍ او مشورې کړې. هندوراس د واقعي ملګري مانا پېژندلې ده. ولسمشرې کاسترو وویل، چین او هندوراس د دواړو پرمختیايي هېوادونو په توګه خپلمنځي همکارۍ ژورې کړې دي، له واقعي څواړخیزم ملاتړ کوي، دا به نه یوازې د چین او لاتيني امریکا هېوادونو ترمنځ همکارۍ پر مخ یوسي، بلکې د پرمختیايي هېوادونو د ګډو ګټو او نړیوال مساوات به ښه وساتي.