د ۱۹ مې دورې آسیايي لوبې د سپتمبر د ۲۳مې نيټې په ماښام د چين په ختيځ د جه جيانګ ولايت په هانګ جو ښار کې پيل شوې. د چين د دولت رئيس شي جين پینګ د دې لوبو د پرانیستې په مراسمو کې په ګډون سره د يادو لوبو پيل اعلان کړ.
د څای چي او دينګ شيو شيانګ په شمول د چين او د اسیا د نورو هېوادونو مشرانو او مېلمنو په دې مراسمو کې هم ګډون کړی و.
د هانګ جو اولمپیک مرکز د دغه ښار د چيان تانګ سيند پر غاړه موقعیت لري او بڼه يې د ګل په څېر ده. د اسيا لوبو مشال په درېیم ځل په چين کې بل شوی دی.
د ماښام په اوو بجو او ۵۸ دقيقو د چين د دولت رئيس شي جين پینګ او مېرمن يې پنګ لي يوان د اسيا د اولمپيک شورا له سرپرست رئيس سينغ او د اولمپيک نړیوالې کمیټې له رئيس باچ سره د روسټرم په لور روان شول او حاضرو کسانو ته يې لاسونه پورته کړل.
د همدې ورځې په اتو بجو او ۹ دقيقتو د ۴۵ هېوادونو او سيمو راغلي سپورټي پلاوي د (( زموږ اسیا)) سندرې په غږېدو سره په وار سره ياد مرکز ته داخل شوي او د حاضرو کسانو له خوا يې تود هرکلی شوی دی.
د چین ۱۳۲۹ کسیز پلاوی تر ټولو وروسته لوبغالي ته ننووت چې ۸۸۶ تنه يې لوبغاړي دي او په ۳۸ لویو او ۴۰۷ کوچنیو سياليو کې به ولوبیږي.
د هانګ جو اسيايي لوبو د تشکيلاتي کميټې رئيس او د جه جيانګ ولايت والي وانګ هاو د لوبو د پرانيستنې مراسمو ته په وينا کې د دې کميټې او د جه جیاګ ولایت د ۶۵ مليونو اوسېدونکو په استازيتوب د اسيا له بېلا بېلو هېوادونو او سیمو څخه د راغلو لوبغاړو او مېلمنو تود هر کلی کړی او هېله يې ښودلې، چې هغوی ميډالونه تر لاسه کړي او خپل خوبونه رښتيا کړي او د نورو هېوادونو له لوبغاړو سره دوستي لا ټینګه کړي، تر څو له دې ښار څخه ليدنه نه هېرېدونکې وي.
د هانګ جو اسيايي لوبو د تشکيلاتي کمیټې رئیس او د چين د اولمپيک کميټې رئيس ګاو جي دان په خپلو خبرو کې ويلي: د رئيس شي جين پینګ او د چین د حکومت تر مشرۍ لاندې د اسیا لوبو په زړه پورې ميله او غونډه به ژر پرانيستل شي. راځئ چې د اولمپیک روحيه وهڅوو، په اسیا کې نوی سپورټي ريکارډ جوړ کړو او د اسيا د ګډ برخليک ټولنې د ابادۍ لپاره ګډې هلې ځلې وکړو.
د اسيا د اولمپيک شورا سرپرست رئیس سينغ په خپلو خبرو کې وويل: د چين حکومت، د چين د اولمپيک کمیټې، د جه جيانګ ولايت حکومت، د هانګ جو ښاروالۍ، د اسيایي لوبو تشکيلاتي کمیټې، د دې ښار اوسېدونکو او د دې لوبو د چمتووالي لپاره ټولو کارکوونکو ته خپل خورا صادقانه درناوی وړاندې کړ او د دې لوبو د چمتوالي کارونه يې وستايل. هغه باور وښود، چې په يادو لوبو کې هر ګډون کوونکی له دې ښار څخه نه هېرېدونکې خاطره ولري.
د همدې شپې په نهو بجو او ۱۶دقيقو د خوشحالۍ وړ وخت رارسېدلی دی. د چين د دولت رئیس شي جين پینګ په هانګ جو ښار کې د دې لوبو د پيل اعلان وکړ.
تر هغه وروسته د عمده مشعل د بلولو مراسم پيل شول. دغه مقدس اور د همدې ولايت د ليانګ جو لرغوني ښار په کنډوالو کې راټول شوی او د سپتمبر له اتمې نيټې څخه د دې ولايت په بېلا بېلو ځايونو کې ليږدول شوی او په پای کې د دې مرکز سپورټي ميدان ته رسیدلی دی. دا د پاملرنې وړ ده چې وروستي مشعل وړونکي وانګ شون له ډيجيټلي مشعل وړونکي سره یو ځای دغه مقدس اور بل کړی دی.
د دې مراسمو په پای کې د اسیايي لوبو موضوعي سندره داسې وغږول شوه: موږ يو ګډ کور لرو او زړونه مو سره يو شوی او مينه مو هم زياته شوې ده. موږ ټول په اسیا کې اوسيږو. ياد مراسم د دې موضوعي سندرې په غږېدو سره پای ته ورسېدل او ټولو لوبغاړو د خوښۍ احساس درلود.
د خبر له مخې په دې مراسمو کې د کمبوديا پاچا نورودوم سيهاموني، د سوريې د ولسمشر بشارالاسد، د کويټ وليعهد مشعل الاحمد او د نیپال صدراعظم پرچاندا په شمول د يو شمېر هېوادونو او نړيوالو سازمانونو مشرانو او استازو او زرګونو نندارچيانو ګډون کړی و.
