ولسمشر غني د لوړې د مراسمو پر مهال وویل چې په پنځلسو ورځو کې به خپله کابینه اعلان کړي او د سرپرستۍ دود به پای ته ورسوي. ولسمشر غني او ویاندویانو یې بیابیا ویلي چې په هېواد کې د سرپرستۍ دود د ختمېدو لپاره عملي اقدام کوي. په تېرو څو اونیو کې ولسي جرګې هم په ځلونو له حکومت غوښتي چې دوی ته نوي وزیران د باور رایې د اخیستلو لپاره ور معرفي کړي، خو تر اوسه یو وزیر هم دغه جرګې ته نه دی معرفي شوی. د ولسي جرګې غړي هم وایي چې تر اوسه د وزیرانو اسناد د ارزونې لپاره نه دي ور لېږل شوي.
سرپرستي په افغان حکومت کې ډېر پخوانی دود دی. ولسمشر غني ان په خپله تېره دوره کې د ولسي جرګې پرېکړو ته ژمن نه و او هغه وزیران یې نه لرې کول چې ولسي جرګې د باور رایه ترې اخیستې وه. د بهرنیو چارو پخواني وزیر څو کاله د سرپرست په توګه دنده ترسره کړه، په داسې حال کې چې سرپرست وزیر یوازې دوې میاشتې حق لري چې خپلو چارو ته ادامه ورکړي. په دې موده کې یې هم صلاحیتونه محدود دي او هومره صلاحیت نه لري لکه د باور رایې لرونکی وزیر یې چې لري.
دا هر څه حیرانوونکي دي. حکومت د فساد پر وړاندې مبارزه کې ناکام دی، د نشه يي توکو پر وړاندې په مبارزه کې ناکام دی، د امنیت په تامین کې ناکام دی، د سولې بین الافغاني خبرو په پيلولو کې پاتې راغلی دی، د ملي حاکمیت د ساتلو په مسئله کې پاتې راغلی، جنايي جرمونه اوج ته رسېدلي، زورواکي په اوج کې ده، د وکیلانو او قوماندانانو زامنو په ښارونو او کلیو کې نظامي مانورونه پيل کړي، دا هر څه د همدې حکومت په لمن کې ترسره کېږي، دا به ښایي سخت کار وي، پر وړاندې یې اقدام نه شي کولی، خو هغه څه چې په دوی پورې اړه لري هغه هم نه شي کولی. وزیر یې پارلمان ته نه معرفي کوي او د باور رایه نه شي ورته اخیستی. دا هر څه شکونه پیدا کوي، اندېښنې پیدا کوي او د ولس په حق کې ستره جفا ده.
په داسې یوه وضعیت کې چې هېواد ژمنو او رښتینو شخصیتونو ته اړتیا لري او د دې وخت دی چې باید وړ او په کار پوه کسان په دندو وګومارل شي او په دې توګه سرپرستي ختمه شي، خو حکومت لا هم خپله سر زوري کوي او هر څه د یوې لوبې په شان روان دي. د چارو یو شمېر شنونکي بیا پر دې باور هم دي چې دلته د فساد لویې معاملې دي، په کمپاینونو کې پیسې لګول شوې دي، نو حکومت اړ دی چې ځینې کسان وزیران کړي. دا کسان بیا د باور رایه نه شي اخیستی، نو له همدې امله هر څه ګډوډ پراته دي.
حکومت باید د فساد له منځه وړلو، قوي ادارې د جوړولو، ثبات، کاري نظم او پرمختګ لپاره په دې حساسو شرایطو کې په کار پوه او باوري کسان پر دنده وګوماري او نور دې په هېواد کې د سرپرستۍ دود په رښتینې مانا ختم کړي. پارلمان هم باید پر حکومت فشار راولي چې د معاملو پر ځای کار او خدمت وکړي.