د چين لخوا توليد شوې د اډورا مېجيک سيټي
(Adora Magic City)په نوم مسافر وړونکې بېړۍ د جنورۍ په لومړۍ نېټه له شانګهای څخه حرکت وکړ او خپله لومړۍ سوداګريزه محموله يې ولېږدوله. دغه بېړۍ له اته کلنۍ علمي څېړنې او پنځه کلن ډيزاین وروسته توليد شوې او توليد يې د بهرنيو خبري رسنيو لخوا د چين د بېړيو جوړولو چارو يوه ارزښتناکه پېښه بلل کېږي. د چين د دولت رئيس شي جین پینګ د ۲۰۲۴م کال د مبارکۍ په خپل پيغام کې ويلي، چې د چين نوښتګرو فعاليتونو خوځنده ځواک ښودلی او پرمختګ يې حياتي ځواک خپل کړی او هرځای کې يې نوي او نوښتګر فعالیتونه تر سترګو کېږي. د يادې بېړۍ توليد د رئيس شي د دغو خبرو يوه نومونه هم بلل کېږي.
چين په تېر ۲۰۲۳م کال کې د کرونا وبا درې کلنې وقايې او کنټرول نوې مرحلې ته ګرځولي او اقتصاد يې ورسره بيا غوړېدلی دی. که څه هم ډېرې ستونزې موجودې دي، خو هر چينايي خپلې هڅې کړې او غير عادي خدمتونه يې ترسره کړي دي. د چين اقتصاد په پرله پسې توګه غوړېدلی، د غلودانو تولید يې په مسلسلو شلو کلونو کې ښه حاصلات ورکړي، پاکې اوبه او زرګون غرونه يې ښه ساتل شوي او د خلکو ژوند د بوختيا ترڅنګه نېکمرغۍ هم خپلوي……. چينايانو په ۲۰۲۳م کال کې ټينګ، ځواکمن، مثبت او باوري ګامونه پورته کړي او ډېر برياليتوبونه يې ترلاسه کړي دي.
شي جين پینګ په خپل پيغام کې وويل، چې چينايانو په ۲۰۲۳م کال کې له توپانونو او بارانونو څخه په وتلو ښکلې منظرې ليدلې دي. نوموړي همدارنګه وويل، چې د چينايانو موخه ډېره لویه او ډېره ساده هم ده او اصلي منځپانګه يې خلکو ته د لا ښه ژوند برابرول دي.
لاښه ژوند د چينايانو د پرمختګ ساده هيله ده، دغه راز د نړيوالو هيله هم ده.
د نوي کال په درشل کې د اوکراين او غزې په ګډون د نړۍ په ځينو هېوادونو او سیمو کې د جګړې د اور لمبې لاهم تودې دي. د ملګرو ملتونو امنيت شورا بيا بيا د خونړيو بريدونو او پېښو په اړه غونډې رابللې او چين له دې امله ډېر اندېښمن دی. شي جين پينګ پدې اړه په خپل پيغام کې وويل، چې هېواد به يې له نړيوالې ټولنې سره د انسانانو برخلیک او ګټو ته په کتو، د بشر د ګډ برخليک ټولنې د جوړولو چارې پرمخ يوسو او لاښه نړۍ به جوړه کړو.
چين په تېر ۲۰۲۳م کال کې د سولې، پرمختګ او د تمدنونو د متقابلې زده کړې لپاره ډېر کارونه کړي، ځکه دغه هېواد پدې نظر دی چې که څه هم په نړۍ کې هر څه بدلېږي، خو سوله او پرمختګ تل عمده نغمه او همکارۍ او ګډې ګټې تلپاتې اصلي قانون دی.
د لاښه ژوند د راوستلو لپاره لومړی سوله او ارامي په کار دي. چين د نړيوالې سولې او ارامۍ لپاره د اوکراين بحران د سياسي حل او د فلسطين او اسرائيلو ترمنځ د شخړو د حل په اړه د خپلو دريځونو سندونه خپاره کړي او يو شمېر حکومتي چارواکي يې د منځګړيتوب لپاره لېږلي دي. د چين هڅې د نړيوالې ټولنې لخوا تائید شوې دي. د مشرانو د نړيوالې اتحاديې رئيس او د سلوانيا پخواني ولسمشر تورکي وويل، په ۲۰۲۳م کال کې د نړيوالې سولې او امنيت د ساتلو په برخه کې ډېر کارونه چين پرمخ وړي دي.
پرمختګ د ټولو ستونزو د حل عمومي کيلي ده. تېر کال د نړۍ د اقتصاد بيا سمسورتيا کمزورې ښودل شوې، په ډېرو هېوادونو کې د خوړو او انرژيو بحرانونو او د توکو بیو لوړوالي ځايي اوسېدونکي له ډېرو فشارونو سره مخ کړي دي. د همدې کال په لومړيو نهو مياشتو کې د چين جي ډي پي يا د کورني تولید عمومي ارزښت د ۲۰۲۲م کال د همدې مودې په پرتله ٪ ۵.۲ زياتوالی ښيي او د نړیوال اقتصاي پرمختګ تر ټولو لوی انجن بلل کېږي. چين همدارنګه په همدې کال کې د صادراتو او وارداتو نندارتون، د خدماتي سوداګرۍ نړيوال نندارتون، نړيوال وارداتي نندارتون او د عرضې ځنځيرونو نړيوال نندارتون کوربتوب کړی چې پدې سره يې د نړیوالو ګډو همکاريو زمينه برابره او له نورو هېوادونو سره يې د پرمختګ فرصتونه شريک کړي دي.
نړيوالو ته د لا ښه ژوند راوستل د نړۍ د عادلانه او معقول مديريت اړتیا هم ده. چين په ۲۰۲۳م کال کې د چين ـ منځنۍ اسيا سرمشريزه او د کمربند او لارې د نړيوالې همکارۍ درېيم فورم ترسره کړی، بريکس ته يې نوي غړي جذب کړي او مشر يې په سانفرانسیسکو ښار کې له خپل امريکايي سيال سره ملاقات وکړل، څو د پرمختيايي هېوادونو پرمختګ تقویه کړي او نړيوال نظام، ثبات او ارامۍ ښه وساتي.
نړيوالو ته د لاښه ژوند راوستل د تمدنونو متقابلې زده کړې او پوهاوي ته هم اړتيا لري. د ۲۰۲۳م کال د هانګجو اسیايي لوبو په پرانيستونکو مراسمو کې د ليانګجو کلتور په اړه ځانګړې هنري نندارې وړاندې شوې او د کتونکو لخوا وستايل شوې. رئيس شي جين پینګ په خپل پيغام کې د چين (ليانګ جو) او (عر لي ټو) لرغونې کلا او په اين شو کلا کې هغه لرغوني کرکټرونه چې د کیشپ پر کاسې او د حيواناتو پر هډوکو حکاکي شوي، ياد کړي او د دغه هېواد د لرغوني تاریخ او پراخ تمدن ښکارندويي يې بللې ده. د هغه په وینا ، همدا د چينايانو د ځاني باور اساس دی او د نړيوال تمدن يې غني کړی دی.
۲۰۲۴م کال د نوي چين د جوړېدو ۷۵ مه کليزه ده. شي جين پينګ په خپل پيغام کې وويل، چې چين به په پرله پسې توګه د نړيوال عدالت لپاره د لوی هېواد مسئوليتونه پر غاړه واخلي، په لوړې سویې به ورخلاصون پراخ کړي، د نړيوال اقتصاد د بياسمسورتيا لپاره به کار وکړي او د خپلو عصري کېدو بهیر د پرمخ بېولو ترڅنګ به له نورو هېوادونو سره د پرمختګ فرصتونه شريک کړي.