افغان حکومت وایي، له طالبانو سره د بین الافغاني خبرو ځای او اجنډا ټاکل شوي دي او ژر به د بین الافغاني خبرو د پيل رسمي نېټه هم اعلان کړي. د ملي مصالحې عالي شورا هیله مندي ښيي چې طالبان هم ژر تر ژره له افغان حکومت سره د خبرو لپاره تیاری وښيي او په دې توګه دوی وتوانېږي چې د لومړي پړاو مذاکراتو معلومات له رسنیو سره شریک کړي. په ورته وخت کې ویل کېږي چې اوربند او د تېرو ۱۹ کلونو لاس ته راوړنې د بحث مهم موضوعات دي. د سیمې هېوادونه هم تمه ښيي چې ژر تر ژره بین الافغاني خبرې پيل شي.
وروسته له دې چې افغان حکومت د طالب بندیانو د خوشي کولو فرمان صادر کړ، تازه افغان چارواکي وایي چې بین الافغاني خبرې به ډېرې ژر په دوحه کې پیل شي. د دوی په خبره، د خبرو ځای دوحه دی او اجنډا یې هم معلومه ده چې اوربند او د تېرو ۱۹ کلونو د لاس ته راوړنو ساتل دي. د ملي مصالحې عالي شورا ویاند فریدون خوځون وایي، افغان حکومت له خپل لوري ټول موراد عملي کړي او ژر تر ژره باید بین الافغاني خبرې پيل شي. د ده په خبره، د بین الافغاني خبرو ځای او اجنډا معلومه ده، خو تمه ده چې په رسمي توګه یې د پيل نېټه هم اعلان شي. دده په وینا: ((د مذاکراتو ځای او اجنډا ټاکل شوي دي. هیله ده چې په رسمي توګه ددغه مذاکراتو د پيل نېټه هم اعلان کړو. هیله دا ده چې په لومړني فرصت کې افغان پلاوی له طالبانو سره کېني او بین الافغاني خبرې پيل کړي)).
د سولې په چارو کې ددولت وزارت بیا وایي چې د سولې اړوند ټول مسایل به افغان حکومت او د ملي مصالحې عالي شورا له مذاکراتي پلاوي سره شریکوي. د سولې په چارو کې د دولت وزارت همدا راز وايي چې د تېرو کلونو لاس ته راوړنې ساتل او اوربند رامنځ ته کول، د دغو مذاکراتو لومړی پړاو دی او پر دې مواردو بحث کېږي.
تر دې وړاندې بیا یو شمېر سرچینو او رسنیو راپور ورکړی و چې د روانې اګسټ میاشتې په ۱۶ مه به بین الافغاني خبرې پيل شي. ولسمشر غني هم ویلي وو چې د طالب بندیانو تر خوشي کولو وروسته به ژر تر ژره بین الافغاني خبرې پيلېږي. د طالبانو د قطر دفتر ویاند سهیل شاهین هم ویلي وو چې په راتلونکو شپږو ورځو کې به له افغان حکومت سره مخامخ مذاکرات پیلوي.
بلخوا د افغانستان د ولسي جرګې غړي هم وایي چې طالبان او افغان حکومت دې ژر تر ژره بین الافغاني خبرې پيل کړي. د دوی په خبره، دغه خبرې باید مسوولانه او د قوانینو په چوکاټ کې وي او باید د تېرو لاس ته راوړنو د نابودۍ او زیانمنېدو سبب نه شي. د ولسي جرګې غړی عبدالخالق وايي: ((ټول افغانان سوله غواړي، تر څنګ یې ارزښتونه هم غواړي. دوی نه غواړي چې د سولې په نامه ارزښتونه له منځه لاړ شي. بنسټونه خراب شي، ښوونځي او تاسیسات ویجاړ شي او بیا څو کاله ناست وو چې دا هر څه له سره جوړ کړو)).
د دې تر څنګ د سیمې هېوادونه هم تمه لري چې بین الافغاني مذاکرات ژر پيل شي. چین وایي، د افغانستان په مسئله کې ښکېل اړخونه باید د سولې په تړاو پر خپلو ژمنو عمل وکړي او افغانستان ته دې دایمي ثبات راولي. د دغه هېواد د بهرنیو چارو وزارت وایي چې له افغان سولې بشپړ ملاتړ کوي او تر څنګ یې د اړتیا په صورت کې همکاریو ته هم تیار دي. ایران هم د بین الافغاني خبرو په برخه کې د همکارۍ ټټر وهلی دی. د افغانستان لپاره د ایران ځانګړي استازي ویلي چې که افغان لوری وغواړي، ایران تیار دی چې د مذاکراتو د یوه پړاو کوربه توب وکړي او په خبره یې، د سولې له پروسې هر ډول ملاتړ ته ادامه ورکوي.