د چين د دولت رئيس شي جين پينګ د مې په ۳۰ مه نېټه په بيجينګ کې د چين – عربي هېوادونو د همکاريو فورم د وزيرانو کچې د لسمې ناستې د پرانيستې په مراسمو کې مهمه وينا وکړه. دا د چين – عربي هېوادونو د لومړنۍ سرمشريزې تر بريالي کېدو وروسته د دواړو لورو تر منځ د وزيرانو د کچې لومړنۍ ناسته ده، له همدې کبله د يادې ناستې د پرېکړو د پلي کولو او په نوي دور کې د ګډې راتلونکې لپاره د چين – عربي هېوادونو ټولنې د جوړيدو د ګړندي کولو لپاره خورا ډير اهميت لري.
سږ کال د چين – عربي هېوادونو د همکاريو فورم د رامنځته کېدو شلمه کليزه ده. په تېرو شلو کلونو کې د چين – عربي نړۍ اړيکو متقابل ستراتيژيک باور پوخ کړی او په دوامداره توګه د عملي همکاريو د پراخېدو او د ولسي تبادلو سبب شوې دي چې په پایله کې یې د جامع، څو اړخيزو او پراخو ابعادو لرونکو اړيکو بېلګه رامنځته شوې ده. د فورم د کاري چوکاټ په لړ کې په مختلفو برخو کې د همکاريو ۱۹ ميکانيزمونه رامنځته شوي او د مختلفو ډولونو ۸۵ سندونه صادر شوي چې د چين – عربو د جامع عملي همکاريو نوي ليدلوري ته بڼه ورکوي.
رئيس شي پرانيستغونډې ته په وينا کې وويل، چين ليواله دی چې له عربي لوري سره کار وکړي څو د مساواتو او متقابلو ګټو پر بنسټ د چين – عربو له اړيکو د کمربند او لار وړانديز په چوکاټ کې د باکيفيته عملي همکاريو بېلګه رامنځته شي.
د دواړو لورو د ګډو هڅو له لارې د چين – عربي هېوادونو د ګډ برخليک ټولنې په جوړيدو کې مثبت پرمختګونه شوي او د دواړو اړخونو تر منځ ستراتيژيک متقابل باور لا ډير پوخ شوی دی.
چين د عربي ټولنې د پراختيا لپاره ښه ځواک دی. دغه هېواد له ۱۴ عربي هېوادونو او عرب ليګ سره جامع ستراتيژيک مشارکت يا ستراتيژيک مشارکتونه رامنځته کړي دي. چين د سعودي عربستان او ايران تر منځ په تاريخي پخلاينې او عرب ليګ ته د سوريې په بيا راستنېدو کې مهم رول لوبولی دی. د عربي هېوادونو د ستراتيژيکې خپلواکۍ د پياوړتيا ملاتړ یې کړی او د فلسطين د مسئلې هوراۍ ته یې د جامع، عادلانه او دايمي حل لارې غوښتنه کړې ده.
د چين او عربي هېوادونو تر منځ عملي همکارۍ د ژوريدو په حال کې دي: ۱۷ عربي هېوادونو د اسيا د بېخ بيناوو د پانګونې بانک غړيتوب اخيستی دی. چين له عرب ليګ او عربي هېوادونو سره د همکاريو ۲۲ سندونه لاسليک کړی څو د کمربند او لار په ابادۍ کې ګډ کار وکړي، چې په پایله کې يې د کمربند او لار وړانديز په چوکاټ کې دواړو لورو د همکاريو تر ۲۰۰ ډيرې پروژې پلې کړې دي. تر دې ټولو ور ها خوا، چين له تېرو څو کلونو راهيسې د عربي هېوادونو تر ټولو لوی سوداګريز شريک دی.
په ۲۰۲۲ کال کې د چين – عربي هېوادونو په لومړۍ سرمشريزه کې رئيس شي جين پينګ د چين – عربو د عملي همکاريو لپاره د «همکاريو اته مهم وړانديزونه» وړاندې کړي وو او دواړو لورو هوکړه کړې وه چې په نوي عصر کې به د چين – عربي هېوادونو د ګډ برخليک ټولنې د رامنځته کولو لپاره ټولې هڅې وکړي. له هغې را هيسې، د چين – عربو اړيکې د ژور انکشاف او لوړ کيفيت نوې مرحلې ته داخلې شوې دي.
رئيس شي په خپله وينا کې يادونه وکړه چې د همکاريو اتو مهمو وړانديزونو مهمې لومړنۍ لاسته راوړنې درلودلې دي او چين ليواله دی چې له عربي هېوادونو سره د «همکاريو د پنځو چوکاټونو» د رامنځته کولو د بنسټونو په توګه ترې کار واخلي: لومړی د نوښتونو لپاره يو ډير متحرک چوکاټ، دويم د پانګونې او مالي همکاريو لپاره پراخ شوی چوکاټ، درېيم د انرژۍ په برخه کې د همکاريو څو اړخيز چوکاټ، څلورم د متقابلو ګټورو اقتصادي او سوداګريزو اړيکو لپاره متوازن او پنځم د ولسي تبادلو لپاره يو پراخ چوکاټ.
چين د چين – عربي هېوادونو د همکاريو فورم د وزيرانو کچې د لسمې غونډې کوربه دی څو د چين – عربو د همکاريو لپاره اجماع پياوړې کړي، د همکاريو لپاره يوه نقشه جوړه او نوي ليدلوري وارزوي. د بحرين، مصر، تونس او عربي محتده اماراتو مشرانو، چې روانه اونۍ د چين په سفر دي، له رئيس شي جين پينګ سره يو ځای د وزيرانو کچې د ناستې په پرانيستغونډه کې ګډون کړی و. دا د چين – عربو د همکارۍ ځانګړنه ده چې له يوې خوا د دولتونو د مشرانو او لوړپوړو چارواکو له لوري رهبري کيږي او له بلې خوا د نوي دور هر اړخيزو اړيکو پياوړي کول پکې د ټولو لورو ګډه هيله ده.