په کابل کې د چین مېډیا ګروپ د پښتو څانګې د خبریالې غوټۍ له لوري د «غوټۍ د کوچنی ټولګی» تر سرلیک لاندې د نوي چاپ شوي کتاب «جراسیمو عجیبه نړۍ» د مخکتنې غونډه ترسره شوه، چې د ښوونځیو زدهکوونکو، ځوانانو، حکومتي چارواکو او د فرهنګي برخې یو شمېر استازو پکې ګډون کړی و.
دغه غونډه د اکسوس کتاب پلورنځي په همغږۍ جوړه شوې وه او د ګډونوالو له پراخ هرکلي سره مخ شوه. په غونډه کې د یاد کتاب د ارزښت او د ماشومانو لپاره د علمي او روغتیايي پوهاوي د لوړولو په اړه خبرې وشوې. ګډونوالو وویل چې دا ډول هڅې کولای شي د ماشومانو د زدهکړې بهیر پیاوړی کړي او هغوی ته د روغتیا ساتنې په برخه کې مهم معلومات وړاندې کړي.
د اکسوس کتاب پلورنځي مسوول صفيالله ناصري وویل چې د غوټۍ نوی کتاب «جراسیمو عجیبه نړۍ» نومېږي او شاوخوا ۵۰۰ د ښوونځیو زدهکوونکو او ځوانانو ته په وړیا توګه وېشل شوی دی. د هغه په وینا، په دې کتاب کې د ویروسونو، میکروبونو او د بدن د ساتنې په اړه داسې معلومات ځای پر ځای شوي چې ماشومان ترې په اسانۍ سره ګټه اخیستلی شي او خپل پوهاوی زیاتولی شي.
په غونډه کې ګډون کوونکو زدهکوونکو د کتاب له خپرېدو خوښي څرګنده کړه او ویې ویل چې تر دې وړاندې یې د داسې موضوعاتو په اړه کافي معلومات نه لرل، خو اوس به د دې کتاب له لوستلو وروسته د جراسیمو او د بدن د خوندیتوب په اړه ډېر څه زده کړي. هغوی همدارنګه د غوټۍ له کارټوني ویډیوګانو ستاینه وکړه او ویې ویل چې دا ویډیوګانې د دوی لپاره ډېرې ګټورې او تعلیمي دي.
یو زدهکوونکي وویل چې د غوټۍ دا هڅې د ماشومانو لپاره ډېرې مهمې دي او د جراسیمو په اړه د پوهېدو لپاره ښه لار برابروي، ځکه ماشومان باید د خپل روغتیا په اړه اساسي معلومات ولري او دا ډول کتابونه ورته عملي لارښود وي. بل ګډونوال وویل چې دا کتاب د ماشومانو لپاره ډېر په زړه پورې دی او هغوی ته دا ور زده کوي چې څنګه خپل بدن د مکروبونو له خطر څخه وساتي.
یو شمېر ښوونکو او ګډونوالو هم وویل چې د غوټۍ دا ډول فعالیتونه د ماشومانو د ذهني ودې لپاره مهم دي او د زدهکړې سره د هغوی علاقه زیاتوي. د هغوی په وینا، دا ډول کتابونه د ماشومانو د فکري ودې ترڅنګ د هغوی د عملي ژوند لپاره هم ګټور تمامېږي او باید لا زیات ورته کار وشي.
ګډونوالو همدارنګه د چین مېډیا ګروپ هڅې وستایلې او ویې ویل چې دوی تل د افغانانو سره په بېلابېلو برخو کې همکاري کړې ده او دا ډول فرهنګي او علمي پروګرامونه کولای شي د دواړو هېوادونو ترمنځ اړیکې نورې هم پیاوړې کړي. هغوی له غوټۍ وغوښتل چې د «غوټۍ د کوچني ټولګي» لړۍ نوره هم پراخه کړي او د ماشومانو او ځوانانو لپاره نور تعلیمي کتابونه هم ولیکي.
د یادونې وړ ده چې دا د غوټۍ د ماشومانو لپاره د علمي کتابونو د لړۍ درېیم ټوک دی. تر دې وړاندې هم هغې دوه نور کتابونه لیکلي او د افغانستان په بېلابېلو ولایتونو کې یې په وړیا توګه وېشلي دي. تمه کېږي چې «جراسیمو عجیبه نړۍ» به هم د هېواد تر لرې پرتو سیمو پورې د ماشومانو لاسونو ته ورسېږي او د هغوی د روغتیايي پوهاوي په لوړولو کې به مهم رول ولوبوي.